У ходзе расьсьледаваньня высьветлілася, што ў зарэгістраваных у Літве і Польшчы кампаніях, якія належаць грамадзяніну Ўкраіны, нелегальна працавалі рабочыя зь Беларусі і Ўкраіны, падраблялі дакумэнты, вялі падвойную бугальтэрыю. Пра гэта паведамляе delfi.lt.
Служба расьсьледаваньня фінансавых злачынстваў Літвы падазрае, што дырэктар кампаніі мог прысвоіць 300 000 эўра. Адзін з аб’ектаў фірмы — Гара Гедзіміна, дзе былі выяўленыя парэшткі Кастуся Каліноўскага і іншых паўстанцаў 1863-64 гадоў.
Вышэйзгаданая кампанія заключала дагаворы з работнікамі, каб даць іх падрадчыкам, аднак у Фонд сацыяльнага страхаваньня аб працаўладкаваньні не паведамляла, таму не плаціла падаткі на на сацыяльнае страхаваньне, ні падатак на ахову здароўя.
Самі работнікі былі ўпэўненыя, што працуюць афіцыйна. Заробак рабочым плацілі наяўнымі, часта яны ставілі свае подпісы ў неафіцыйных дакумэнтах аб выплаце заробкаў. Нягледзячы на тое, што абедзьве гэтыя кампаніі куплялі рабочую вопратку, сродкі для бясьпекі, гэтыя выдаткі яны вылічвалі з заробкаў работнікаў.
На пачатку 2016 году на гары Гедзіміна ў Вільні здарыўся апоўзень, а неўзабаве яшчэ адзін. Паўстала пагроза, што можа не ўтрываць славутая вежа, помнік гісторыі і культуры ХIV стагодзьдзя.
У студзені 2017-га першымі там пачалі працаваць археолягі — літаральна празь некалькі дзён ім адкрылася пахавальная яма, у якой, згодна з пазьнейшымі антрапалягічнымі дасьледаваньнямі, ляжаў Кастусь Каліноўскі. Агулам знайшлі парэшткі 21 паўстанца, адзін зь іх дагэтуль не апазнаны.
