Сьледчы камітэт Беларусі паведаміў аб завяршэньні расьсьледаваньня справы аб шкодзе дзяржаўнаму апэратару сувязі.
23-гадовы мужчына з Горадзенскай вобласьці і 24-гадовы жыхар Менску незаконна прапускалі галасавыя тэлефанаваньні праз інтэрнэт.
Паводле сьледчых, мужчыны «ўступілі ў злачынную змову» зь нявызначанымі замежнікамі і за грошы займаліся «нелегальным пропускам міжнароднага галасавога інтэрнэт-трафіку». Дзеля гэтага яны здымалі кватэтэры ў розных абласьцях Беларусі, праз спэцыяльнае абсталяваньне прымалі і перанакіроўвалі міжнародныя тэлефанаваньні.
Як падлічылі сьледчыя, за некалькі месяцаў мужчыны зарабілі 23 тысячы рублёў, а «Белтэлекам» недазарабіў 43 тысячы. Таксама сьцьвярджаецца, што яны маглі праслухоўваць размовы, якія перанакіроўвалі.
Дзеяньні затрыманых кваліфікавалі як «нанясеньне шкоды пры адсутнасьці прыкметаў крадзяжу, учыненае групай асобаў» (ч.2 арт. 216 КК РБ), «незаконную прадпрымальніцкую дзейнасьць з прыбыткам у буйным памеры» (ч.1 арт. 233) і «неправамернае авалоданьне кампутарнай інфармацыяй» (арт. 352).
Мянчук часткова прызнаў віну і кампэнсуе шкоду, яго вызвалілі пад асабістыя парукі. Ягоны саўдзельнік зьмешчаны пад варту. Ім пагражае да 5 гадоў турмы.
Калі тэлефанаваць праз інтэрнэт законна, а калі не
Тэлефанаваньні праз інтэрнэт можна рабіць у праграмах кшталту Skype і Viber, у тым ліку тэлефанаваць зь іх на мабільныя і гарадзкія тэлефоны – гэта завецца VoIP-тэлефаніяй і выходзіць таньней за звычайныя міжнародныя тэлефанаваньні. Але такая дзейнасьць рэгулюецца законам.
У 2016 годзе Аляксандар Лукашэнка сваім указам цалкам забараніў гэта. Але мэсэнджэры не заблякавалі — прэзыдэнцкі апэратыўна-аналітычны цэнтар падзаконным актам дазволіў IP-тэлефанію пасьля платнай рэгістрацыі пастаўшчыка паслугаў і ня стаў распаўсюджваць забарону на Skype і Viber. Ад ідэі дадатковага «падатку на Skype» у Мінсувязі пакуль адмовіліся.
Перахоп чужых тэлефанаваньняў не законны ні пры якіх умовах. Але гэта часам робяць махляры ў розных краінах. Беларусы ня раз заўважалі выпадкі, калі тэлефанаваньні ў Беларусь з-за мяжы даходзяць не да патрэбнага абанэнта, а да незнаёмых людзей, якія просяць проста пачакаць, пакуль паклічуць да слухаўкі знаёмага (а ў час чаканьня грошы за сувязь сьпісваюцца).
