У Францыі больш за 150 тысяч чалавек выйшлі на першамайскія акцыі. Пра гэта паведаміла МУС краіны. Па дадзеных францускіх СМІ, амаль палова людзей, якія выйшлі на мітынгі, — прадстаўнікі руху «жоўтых камізэлек».
На мітынгах у розных частках Парыжу, паводле інфармацыі паліцыі, сабраліся каля 16 тысяч пратэстоўцаў. Па іншых зьвестках, колькасьць удзельнікаў пратэстаў у Парыжы — 40 тысяч, піша Le Figaro.
У Парыжы адбыліся сутыкненьні дэманстрантаў з паліцыянтамі. Паліцыя выкарыстала дубінкі для разгону пратэстоўцаў. Былі параненыя двое паліцэйскіх. Сярод пратэстоўцаў ёсьць, як найменей, два параненых, піша Le Nouvel Observateur. У Парыжы паліцэйскія затрымалі амаль 300 чалавек.
25 красавіка, за шэсьць дзён да сьвята 1 траўня, Эмануэль Макрон прадставіў вынікі так званых вялікіх дэбатаў. Па выніках скаргаў французаў, якія рэгістравалі мэрыі па ўсёй краіне, Макрон зрабіў шэраг прапановаў для паніжэньня ўзроўню сацыяльнага напружаньня ў Францыі. Сярод іх — зьніжэньне падаткаў і павышэньне пэнсій з улікам росту коштаў. Аднак лідэры «жоўтых камізэлек» заявілі, што гэтых захадаў недастаткова і што рух ня мае намеру спыняць пратэсты.
