Эўрапейскі зьвяз згаджаецца на новы перанос даты выхаду Вялікабрытаніі з супольнасьці, гаворыцца ў праекце рашэньня саміту ЭЗ, які цытуе агенцтва Reuters.
10 красавіка саміт ЭЗ павінен вызначыць новую дату Brexit. У праекце рашэньня гаворыцца, што Вялікабрытанія павінна правесьці на сваёй тэрыторыі выбары ў Эўрапарлямэнт у траўні, а калі ня зробіць гэтага, то 1 чэрвеня павінна будзе пакінуць ЭЗ.
Раней 9 красавіка брытанскі парлямэнт 420 галасамі супраць 110 ухваліў прапанову прэм’ер-міністра Тэрэзы Мэй, каб папрасіць Эўразьвяз перанесьці дату выхаду краіны з ЭЗ з 12 красавіка на 30 чэрвеня.
Гэта адбылося пасьля таго, як парлямэнт канчаткова ўхваліў законапраект, які патрабуе ад прэм’ера дамагацца пераносу даты Brexit, каб пазьбегнуць выхаду з ЭЗ без пагадненьня.
Кабінэт Мэй вядзе перамовы з апазыцыйнымі лейбарыстаў аб выпрацоўцы кампраміснага падыходу да Brexit, аднак яны адкладзеныя да чацьвярга, гэта значыць да завяршэньня саміту ЭЗ.
