Міністры замежных справаў краінаў Эўразьвязу на нарадзе ў Брусэлі зацьвердзілі сьпіс з дзевяці фізычных асобаў, супраць якіх будуць уведзеныя санкцыі ў сувязі з арганізацыяй на тэрыторыі непрызнаных «ЛНР» і «ДНР» выбараў кіраўнікоў рэгіёнаў і ў мясцовыя парлямэнты.
Пра гэта паведаміў карэспандэнт Радыё Свабода з Брусэлю.
Пад санкцыі трапілі наступныя асобы:
- старшыня выбарчай камісіі ў так званай «ДНР» Вольга Пазьнякова,
- старшыня выбарчай камісіі ў так званай «ЛНР» Алена Краўчанка,
- абраны кіраўнік так званай «ЛНР» Леанід Пасечнік;
- кіраўнік так званага «народнага савету» «ДНР» Уладзімір Бідзеўка,
- старшыня так званага «народнага савету» «ЛНР» Дзяніс Мірашнічэнка,
- намесьнік старшыні выбарчай камісіі «ДНР» Аляксей Найдзенка,
- намесьнік старшыні выбарчай камісіі «ЛНР» Максім Сьвідчанка,
- сакратар выбарчай камісіі «ДНР» Уладзімір Высоцкі,
- сакратар выбарчай камісіі «ЛНР» Кацярына Цярэшчанка.
Абраны кіраўніком так званай «ДНР» Дзяніс Пушылін раней ужо трапіў пад санкцыі ЭЗ.
У ЭЗ заявілі, што выбары, якія прайшлі ў сэпаратысцкіх рэгіёнах, супярэчаць Менскім пагадненьням.
Неўзабаве ў Брусэлі пройдзе нарада кіраўніцтва ЭЗ, на якім санкцыйны сьпіс будзе зацьверджаны. Кіраўнік МЗС Нямеччыны Гайка Маас выказаў упэўненасьць, што краіны ЭЗ у сьнежні працягнуць ужо існыя санкцыі супраць сэпаратысцкіх рэгіёнаў Украіны. Гэтыя санкцыі былі ўведзеныя ў сувязі з анэксіяй Крыму Расеяй і канфліктам на ўсходзе Ўкраіны.
Таксама кіраўнікі ЭЗ абмяркуюць інцыдэнт у Керчанскай пратоцы, які адбыўся 25 лістапада, калі Расея захапіла ў Чорным моры тры ўкраінскія карабля і экіпажы, абвінаваціўшы іх у незаконным перасячэньні мяжы.
