Колькасьць ахвяраў расейскага ўдару па Кіеве вырасла да 23, паведаміў начальнік Кіеўскай гарадзкой вайсковай адміністрацыі Цімур Ткачэнка.
Сярод загінулых чацьвёра дзяцей. Пацярпелі 52 чалавекі.
Расейскае войска ў ноч на 28 жніўня нанесла масаваны ўдар па Ўкраіне, у тым ліку па Кіеве. Паводле Ткачэнкі, для ўдару выкарыстоўвалі бесьпілётнікі тыпу «Шахед», балістычныя і крылатыя ракеты. Пападаньні зафіксаваныя больш чым у 20 лякацыях у Дарніцкім, Дняпроўскім, Саломенскім, Шаўчэнкаўскім, Галасееўскім, Абалонскім і Дзясьнянскім раёнах гораду.
У Дзяржаўнай службе надзвычайных сытуацыяў Украіны паведамілі, што ноччу ратаўнікі працавалі на месцах разбурэньняў, працягвалі разбор завалаў і пошукавыя работы. Псыхолягі ведамства аказалі дапамогу 147 жыхарам гораду.
«Гэтыя сёньняшнія расейскія ракеты і ўдарныя дроны — выразны адказ усім у сьвеце, хто тыднямі і месяцамі заклікаў да прыпыненьня агню і рэальнай дыпляматыі. Расея выбірае балістыку, а ня стол перамоваў. Выбірае працягваць забойствы, а не заканчваць вайну. І гэта значыць, што Расея дагэтуль не баіцца наступстваў. Расея дагэтуль карыстаецца тым, што прынамсі частка сьвету заплюшчвае вочы на забітых дзяцей і шукае апраўданьня для Пуціна», — заявіў напярэдадні прэзыдэнт Украіны Ўладзімір Зяленскі.
У выніку атакі таксама былі пашкоджаныя будынкі офісу кіеўскага бюро Радыё Свабодная Эўропа / Радыё Свабода, выданьня «Українська правда» і місіі ЭЗ.
