Эўрапейская камісія распрацавала плян процідзеяньня дэзынфармацыі з боку Расеі. Яго галоўная мэта — не дапусьціць умяшаньня Крамля падчас выбараў у Эўрапейскі парлямэнт у траўні 2019 году, а таксама ў часе выбараў у краінах ЭЗ у 2020 годзе.
У Эўразьвязе перакананыя, што Расея зьяўляецца адной з галоўных пагрозаў з пункту гледжаньня вырабу дэзынфармацыі. «Дэзынфармацыйныя кампаніі, зьвязаныя з вайной у Сырыі, з крушэньнем рэйсу MH17 ва Ўкраіне і выкарыстаньнем хімічнай зброі падчас нападу ў Солсбэры, старанна задакумэнтаваныя. У выпадку з Расеяй гэтыя доказы моцныя. Аднак іншыя краіны таксама разгортваюць дэзынфармацыйныя стратэгіі, хутка вывучаючы мэтады Расеі», — адзначаецца ў пляне процідзеяньня, прадстаўленым Эўракамісіяй.
Каб супрацьстаяць дэзынфармацыі, аўтары дакумэнту прапануюць палепшыць інстытуты ЭЗ па выяўленьні і аналізу непраўдзівых зьвестак і павысіць дасьведчанасьць і ўстойлівасьць грамадзтва да такіх дадзеных. Плян таксама прадугледжвае павелічэньне бюджэту зьнешнепалітычнага ведамства ЭЗ на стратэгічныя камунікацыі з двух да пяці мільёнаў эўра.
