Прэзыдэнт Украіны Пятро Парашэнка заявіў, што Ўкраіна не плянуе ваенным шляхам вяртаць пад свой кантроль тэрыторыі на ўсходзе краіны, кантраляваныя сэпаратыстамі, якіх падтрымлівае Расея.
Выступаючы ў Харкаве, Парашэнка падкрэсьліў, што наступ на пазыцыі сэпаратыстаў у Данецкай і Луганскай абласьцях мог бы прывесьці да буйнамаштабнага канфлікту з Расеяй.
Акрамя таго, як выказаўся прэзыдэнт, «Украіна — не Расея», і таму не дапусьціць штурму Данецка, падобнага да штурму Грознага падчас вайны ў Чачні.
Паводле Парашэнкі, больш як 60 працэнтаў грамадзянаў Украіны выступае за палітыка-дыпляматычнае вырашэньне канфлікту ў Данбасе, і ён прытрымліваецца той жа пазыцыі.
Украіна падтрымлівае ідэю ўводу ў кантраляваныя сэпаратыстамі раёны міжнародных міратворчых сіл.
Узброены канфлікт у Данбасе пачаўся ў 2014 годзе і забраў больш як 10 тысяч жыцьцяў. Украіна абвінавачвае Расею ў падтрымцы сэпаратыстаў, у тым ліку і вайсковай, Масква адмаўляе ўдзел расейскай арміі ў канфлікце.
