Паліцыя графства Мэрсісайд, што ў Вялікай Брытаніі, пачала расьсьледаваць пагрозы забойствам галкіпэру футбольнага клюбу «Лівэрпуль» Лёрысу Карыюсу, піша The Telegraph.
Фінальны матч Лігі чэмпіёнаў скончыўся ў Кіеве 26 траўня перамогай мадрыдзкага «Рэалу» над ангельскім «Лівэрпулем» зь лікам 3:1. Мадрыдзкі «Рэал» трэці раз запар стаў пераможцам у гэтым турніры.
Першы гол «Рэалу» атрымаўся кур’ёзным: Лёрыс Карыюс выкідаў мяч ад брамы, але выпадкова «паклаў» яго на нагу нападніку праціўніка. За другі прапушчаны мяч яго не крытыкавалі — удар быў вельмі няпросты, некаторыя называюць гол найпрыгажэйшым у сэзоне. Ды шмат крытыкавалі за трэці — гэткія ўдары рэдка прапускаюць на спаборніцтвах узроўню Лігі чэмпіёнаў.
Фінал Лігі чэмпіёнаў у найгарачэйшых фота Reuters
Карыюсу і ягонай сям’і пачалі паступаць сотні пагрозаў у сацсетках і праз мэсэрджэры, у тым ліку пагрозы забойствам, а таксама фразы кшталту «твае дзеці заслугоўваюць сьмерці ад раку». Паліцыя сьцьвярджае, што сур’ёзна ставіцца да пагрозаў забойствам і будзе расьсьледаваць такія выпадкі.
Сам футбаліст папрасіў прабачэньня перад фанатамі і на полі па фінальным сьвістку, і ў сваім твітэры на наступны дзень пасьля гульні. Шмат хто падтрымлівае яго словамі зь нефармальнага гімну «Лівэрпуля» — «Ты ніколі не застанесься адзін» («You’ll Never Walk Alone»).
У складзе «Лівэрпуля» 24-гадовы брамнік згуляў ужо 49 гульняў за два сэзоны, да таго пяць сэзонаў гуляў за нямецкі «Майнц-05».
