Людзі сталі з плякатамі ўздоўж вуліцы Менскай — менавіта па ёй, міма школы і паліклінікі, пад вокнамі жылых дамоў, пройдзе асноўны грузавы паток на завод «Амкадор», які плянуецца збудаваць у Калодзішчах.
Паводле парталу TUT.BY, міністар праехаў міма, не спыняючыся. Яшчэ раней вылучаная жыхарамі кантактная група з трох чалавек паехала да заводу, спадзеючыся сустрэцца зь міністрам там. Але іх на завод не пусьцілі.
Вясной сёлета мясцовыя жыхары сабралі каля тысячы подпісаў і перадалі іх у выканкам Менскага раёну, але подпісы там не зарэгістравалі. Цяпер сабраныя ўжо тры тысячы подпісаў, якія мяркуецца перадаць у адміністрацыю прэзыдэнта.
Участак зямлі ў прамысловым вузьле ўздоўж вуліцы Менскай-Прамысловай даўно належыць заводу «Амкадор». Гэта камунальна-складзкая зона. Плянуецца, што на гэты ўчастак будзе перанесена частка вытворчасьці з гораду. Для гэтага там пабудуюць новыя карпусы. Для заводу вуліцу ператвораць у чатырохпалосную (або трохпалосную) — па ёй на завод пойдуць грузавікі.
Мяркуецца, што тры гектары лесу каля Міхайлава Кута высякуць і выкапаюць там для заводу сажалкі-выпарнікі з дрэніруючым эфэктам. А сама вытворчасьць, на якой будуць выпускаць па 500 пагрузчыкаў штомесяц, на думку жыхароў, будзе экалягічна вельмі небясьпечнаю. Меркаваныя сажалкі ў розных дакумэнтах называюцца па-рознаму, паводле некаторых з гэтых дакумэнтаў, яны — фільтравальныя.
Сёлета ў ліпені стала вядома, што на пашырэньне вытворчасьці «Амкадору» ў Калодзішчах Кітай выдзяляе крэдыт памерам амаль 193 мільёны даляраў.
