Больш за сто пяцьдзесят чалавек затрыманыя ў Ерэване пасьля сутыкненьня дэманстрантаў з паліцыяй у захопленага будынку паліцыі. Пра гэта заявіла прэс-служба армянскай паліцыі.
Увечары 29 ліпеня ў Ерэване адбыліся сутыкненьні паміж дэманстрантамі і паліцэйскімі. Мітынгоўцы выступалі ў падтрымку ўзброенай групы, якая ўтрымлівае будынак палка патрульна-паставой службы. Супраць удзельнікаў шэсьця паліцэйскія ўжылі спэцыяльныя сродкі. Пацярпела каля 60 чалавек, у тым ліку журналісты.
Прадстаўнік партыі «Спадчына» Армэн Марцірасян заявіў, што сутыкненьні былі справакаваныя паліцыянтамі ў цывільным. Паліцыя гэтую інфармацыю абвергла.
17 ліпеня група ўзброеных людзей захапіла будынак палка патрульна-паставой службы з патрабаваньнямі вызваліць каардынатара апазыцыйнай грамадзянскай ініцыятывы «Устаноўчы парлямэнт» Жырайра Сэфіляна. У выніку быў забіты палкоўнік паліцыі, чацьвёра паліцэйскіх атрымалі раненьні. Нападнікі ўзялі ў закладнікі сем чалавек і ўтрымлівалі іх амаль тыдзень.
Прыхільнікі групы, якая захапіла будынак, некалькі разоў зьбіраліся на мітынгі, патрабуючы адстаўкі прэзыдэнта Армэніі Сержа Саргсяна.
