«Арт Сядзіба» стамілася высяляцца і будуе свой дом

«Арт Сядзіба» — гэта месца, дзе выступаў Зьміцер Вайцюшкевіч, паказваў спэктаклі Свабодны тэатар, прэзэнтаваў свае кнігі Ўладзімір Някляеў, выступалі маладыя беларускія гурты і літаратары, праводзілі сустрэчы і прэзэнтацыі грамадзкія арганізацыі.

Уладальнік памяшканьня, якое арандуе «Арт-сядзіба» — Беларускае таварыства паляўнічых і рыбаловаў — месяц таму паведаміла, што разрывае дамову арэнды і 21 лютага культурная пляцоўка павінна вызваліць пакой. Паводле афіцыйнай фармулёўкі, памяшканьне ўладальнікам тэрмінова спатрэбілася, каб аднавіць швачны цэх. Хоць дамова павінна дзейнічаць да 30 верасьня, а арэнда аплачаная да 1 сакавіка.

За няпоўныя 5 месяцаў на культурнай пляцоўцы ў Інструмэнтальным завулку, 6 адбылося каля 80 розных імпрэзаў.

Гэта ўжо пятае памяшканьне, якое «Арт-сядзіба» мусіць пакідаць за 2 гады працы. Таму актывісты вырашылі: хопіць арандаваць, трэба набываць уласнае. Хлопцы палічылі, што каб набыць памяшканьне плошчай 100 квадратных мэтраў, спатрэбіцца як мінімум 200 тысяч даляраў (кошт квадрата ў офісных цэнтрах цяпер — каля 2 тысяч даляраў). І сёньня стартуе кампанія «Пабудуем „Арт-сядзібу“ разам», кажа дырэктар культурнай пляцоўкі Павал Белавус:

«Прыйшоў час зьвярнуцца да беларусаў, зьвярнуцца да бізнэсоўцаў, зьвярнуцца да беларусаў замежжа, да ўсіх, каму неабыякавыя разьвіцьцё мовы, культуры, грамадзкай актыўнасьці, каму гэта неабыякава, каб мы гэта падтрымалі і мы разам, усім сьветам, усімі беларусамі — як кажуць, сабралі на Нацыянальную бібліятэку, дык чаму ня можам сабраць на «Арт-сядзібу»? Мы кансультаваліся зь юрыстамі, абмяркоўвалі, як гэта правільна, законна зрабіць. І сёньня запускаем кампанію, якая называецца «Будуем „Арт-сядзібу“ разам».

Для гэтых мэтаў арт-студыя «PRAS» распрацавала сайт: dom.artsiadziba.by. Асноўная частка сайту — гэта інтэрактыўны дом, распавядае Мікіта Броўка:

«Гэты сайт уяўляе сабой такі віртуальны дом. Ён складаецца з 40 тысяч цаглінак, кожная зь іх будзе каштаваць па 5 даляраў. І кожны чалавек зможа набыць адну ці любую колькасьць цаглінак у гэтым доме. Грошы можна перадаць альбо нам пэрсанальна, і мы ўсё аформім па законе, альбо пералічыць на рахунак нашай арганізацыі, а таксама праз SMS, міжнародную плацёжную сыстэму PayPal, Money, Yandex-грошы. Мы спадзяёмся, што гэта будзе прывабна для бізнэсу. Нейкія кампаніі могуць набыць цаглінак значна больш, чым прыватная асоба».

У «Арт-сядзібы» ёсьць падмурак — маладыя, актыўныя, адукаваныя беларусы. Ёсьць і дах — гэта мары і памкненьні гэтых беларусаў. Але ў «Арт-сядзібы» няма ўласных сьценаў — пяты раз высяляюць. І каб аб’яднаць падмурак і дах, трэба вымураваць сьцены, кажа Павал Белавус:

«Нашыя муры складаюцца з 40 тысяч цаглінак. Давайце разам зьбяром гэтыя цаглінкі ды аб’яднаем дах і падмурак моцнымі сьценамі, у якіх будзе жыць і разьвівацца беларуская культура, мова і мастацтва. 40 тысяч цаглінак складаюць 36 кватэр — музыкаў, мастакоў, паэтаў, хакеістаў, нацыяналістаў, прыгожых дзяўчатак, аматараў піва, беларускамоўных, фатографаў, праграмістаў. Кожны тут зможа знайсьці сваю кватэру».

Кампанію «Пабудуем „Арт-сядзібу“ разам» падтрымліваюць і шматлікія творчыя асобы. Сьпявак і актор Вінцэнт таксама зьбіраецца купіць цаглінку:

«Цяпер можна купляць зоркі на небе, а тут прапануюць купляць цаглінкі. Я сам выкуплю адну цаглінку, каб мець, і буду ўсіх сяброў заангажоўваць у гэты праект, агітаваць, каб набывалі сабе кватэркі такія. Тым больш, калі цяжка купіць сапраўдную кватэру, дык набуду хоць віртуальную».

Сьпеваку Зьмітру Вайцюшкевічу «Арт-сядзіба» ня раз давала сваю пляцоўку:

«Ёсьць розная моладзь, і пра розную моладзь трэба дбаць. І „Арт-сядзіба“ ня з самай горшай беларускай моладзьдзю працавала і працуе. І так ставіцца да такіх арганізацыяў, як „Арт-сядзіба“, нельга, гэта не па-дзяржаўнаму, я б нават так сказаў. Яны і мяне таксама ў цяжкія часы падтрымлівалі, давалі там выступаць, давалі магчымасьць людзям прыходзіць на канцэрты, выпускаць пару. Мне здаецца, што лепей так, чым дзесьці па падвалах моладзь будзе швэндацца. Таму я іх падтрымліваю».

Адзін з заснавальнікаў «Арт-сядзібы» журналіст Франак Вячорка перакананы: «Арт-сядзібу» шчэмяць за тое, што яна дае прастору незалежным, забароненым, яна ня дзеліць на сваіх і чужых. І ўсе надуманыя прычыны высяленьняў маюць палітычны кантэкст:

«Таму гэтым разам мы вырашылі дзейнічаць крэатыўна, а ня проста шукаць новае памяшканьне. Мы вырашылі, па-першае, пазмагацца за гэтую сядзібу, не здаваць яе бяз бою. Калі трэба, то будзем і галадаць, калі трэба, то збудуем барыкады — зараз гэта трэнд. Але ў любым разе нельга так проста саступаць тое, чаму мы прысьвячаем сваю душу, сваё сэрца, свой час. Дом — гэта толькі складовая частка кампаніі, мэта якой — стварыць абсалютна незалежную прастору для творцаў, грамадзкіх дзеячаў, ініцыятываў».