د سري لنکا او د زېمبابوې د کرکټ ملي لوبډلې د ۲۰ اووره درې اړخیزه لوبلړۍ په سیالۍ کې یو بل ته مخامخېږي.
د راولپېنډۍ په لوبغالي کې د نومبر ۲۰مې د پېښور پر وخت د ماښام پر شپږ نیمو او د کابل پر شپږو بجو پیلېږي.
تر دې مخکې کوربه پاکستان د نومبر پر ۱۹مه په لومړۍ سیالۍ کې زېمبابوې ته په پینځو وېکټو ماتې ورکړه.
د نومبر پر ۲۲مه بله سیالي د سري لنکا او پاکستان ترمینځ کېږي.
د ۲۰ اووره کرکټ درې اخیزه لوبلړۍ سیالۍ د نومبر پر ۱۸مه پیل شوې او ټاکل شوې چې پایلوبه یې د نومبر پر ۲۹مه وشي.
ټاکل شوې وه چې په هغو سیالیو کې د کوربه پاکستان او سري لنکا ترڅنګ د افغانستان کرکټ لوبډلې هم برخه اخیستې وای.
خو افغان کرکټ بورډ په اکتوبر کې په پکتیکا کې د پاکستانیو ځواکونو په برید کې د "کرکټ د درې ځوانو لوبغاړو" تر وژنې وروسته په هغو درې اړخیزه سیالیو کې د ګډون پلان لغوه کړی وو.
تر دې وروسته د پاکستان کرکټ بورډ اعلان وکړ چې د افغانستان پر ځای به زېمبابوې په سیالیو کې ګډون وکړي.
