د پښتو ژبې د نومیالي مزاحیه اداکار حیات خان، چې په میراوس پېژندل کېده، جنازه د خیبر پښتونخوا په چارسده کې په خپله پلرنۍ هدیره کې خاورو ته سپارل شوې ده.
د چارسدې د تنګي تحصیل اوسېدونکي او خبریال نصر الله خټک مشال راډیو ته وویل چې د اپرېل پر څلورمه سهار ۱۰ بجې جنازې ته په زرګونه خلک ورغلي ول.
میراوس د اپرېل پر درېیمه مازیګر مهال د شاوخوا ۷۰ کلونو په عمر کې ومړ.
د هغه کورنۍ وايي چې نوموړی له اوږدې مودې راهیسې ناروغ وو او د شکر یا شوګر په رنځ اخته وو.
میراوس څو لسیزې په پېښور کې د پاکستان په دولتي راډیو او ټېلېوېژن کې کار کړی وو. نوموړي به د تیېټر (تیاتر) دریځ (سټېج) ډرامو او لنډو خپرونو له لارې خپل هنر ښوده، ټوکې به یې کولې او د خلکو پر مخ به یې موسکا او خندا راوسته. هغه د ټېلېوېژن لپاره یې ګڼې خاکې جوړې کړې وې.
هغه داراز په غږیزو کیسټونو کې هم طنزیه او مزاحیه پارچې او شعرونه خپرول چې خلکو به اخیستې او په کورونو کې به یې په ټېپ رېکارډر اورېدې.
میراوس د چارسدې په تنګي ملا خېل کلي کې زېږېدلی وو. نوموړي په ۲۰۱۱ز کال کې مشال راډیو ته ویلي ول چې پر شناختي کارډ یې د زوکړې نېټه ۱۹۴۸ز کال لیکل شوې خو دا تاریخ سم نه دی او تر هغې څو کاله وروسته زېږېدلی وو.
د نوموړي په خبره، لومړنۍ زده کړې یې په خپل کلي کې کړې وې، هلته یې څه ځمکه لرله او کورنۍ به یې په بزګرۍ ژوند تېراوه. میراوس په هغه مرکه کې ویلي ول چې د ښوونځي له وختونو یې ټوکې کولې، بنډارونه یې کول او خلکو به یې میداني کیسټونه ثبتول او په نورو به یې وېشل.
یو میوزیک سنټر په ۱۹۷۵ز کال کې د میراوس لومړی کیسټ خپور کړ. د هغه په خبره، چې تر هغې وروسته یې شاوخوا ۶۷۰ کیسټونه خپاره شوي ول.
د میراوس په طنزیه کارونو کې به اکثر ټولنیز او اصلاحي پیغامونه هم ول او په ځانګړي ډول یې د تعلیم ودې او د نشه يي توکو د کارونې پرضد هڅې کولې.
میراوس د پاکستان په پښتون مېشتو سیمو او افغانستان کې ګڼ مینه وال لرل او د هنري هلو ځلو لپاره یې له هېواده بهر هم سفرونه کړي ول.
نوموړي د خپل ژوند په وروستیو کلونو کې هنري کارونه کم کړي ول او په مومندو کې یې یو رستوران پرانیستی وو چې پر دېوالونو یې د نشو پرضد شعارونه لیکلي ول.
