د نایجېریا چارواکي وايي چې هغه ۲۸۷ زده کوونکي یې خوشې کړي دي چې د روانې میاشت په پیل کې تښتول شوي ول.
هغه ماشومان د مارچ پر اوومه له شمال لویدیز کادونا ولایت له وړوکي ښار کورېګا څخه تښتول شوي ول.
د کادونا والي اووبا ثاني د مارچ پر ۲۴مه د هغوی د خوشې کېدو خبر ورکړ خو نور معلومات یې ور نه کړل.
نوموړي په یو بیان کې د ولسمشر بولا تېنوبو مننه وه چې "هغه په ځانګړې توګه د کورېګا د ښوونځي شاګردانو د ازادولو پر مهال د هغوی خوندیتوب باوري کړ."
تېنوبو ژمنه کړې وه چې د ماشومانو د خوشې کولو په بدل کې به "یوه انه یا غیران" تاوان "هم ور نه کړي."
خو اسوشيېټېډ پرېس اژانس وايي چې پر دې سربېره د خلکو د کورنیو غړي تښتوونکو ته د تاوان بندوبست کوي او د نایجېریا چارواکي د تاوان ورکولو اعتراف نه کوي.
اژانس وايي چې له تښتول شویو څخه یې لږ تر لږه ۱۰۰ زده کوونکي تر ۱۲ کلونو کم عمري ول.
د هغو ماشومانو د تښتولو ذمه واري چا نه وه منلې خو ځايي خلکو ویل چې هغه کار هلته موجودو وسلوالو داړه مارو یا شوکمارو کړی دی چې په عامه وژنو او د تاوان لپاره په تښتونو کې ککړ دي.
اژانس وايي چې له ۲۰۱۴ز کال راهیسې په هغه افریقايي هېواد کې د ښوونځیولږ تر لږه ۱،۴۰۰ زده کوونکي تښتول شوي دي.
هغه کال وسلوالې ډلې بوکو حرام سلګونه نجونه تښتولې وې.
اژانس زیاتوي چې زیاتره اغواګانې د نایجېریا په شمال لویدیځ او مرکزي سیمو کې کېږي چې پکې یوشمېر وسلوالې ډلې فعاله دي. هغه وسلوالې ډلې اکثر د کلیو اوسېدونکي او مساپر په نښه کوي.
