د نیو زیلینډ د کرکټ ملي لوبډلې د اتلانو جام (چمپیینز ټرافۍ) په دویمه نیمه پایلوبه کې جنوبي افریقا ته د ۳۶۳ منډو هدف ورکړی دی.
د لاهور په قذافي لوبغالي کې د مارچ پینځمې د سیالۍ پچه نیو زیلینډ وګټله او لومړی یې توپوهنه غوره کړه.
د نیو زیلینډ بیټرانو رچېن روېندرا او کېن وېلییمسن د وېل ینګ تر سوځېدو وروسته ښه توپوهنه وکړه. روېندرا ۱۰۸ او وېلییمسن ۱۰۲ منډې وکړې. ګلېن فېلېپس او ډيرېل مېچل ۴۹، ۴۹ منډې وکړې.
نیو زیلینډ په ټاکلیو ۵۰ اوورونو کې د شپږو لوبغاړو په زیان ۳۶۲ منډې وکړې.
د جنوبي افریقا لونګي اېنګېدي درې، کګیسو ربادا دوه او ویان مولډر یوه وېکټه واخیسته.
تر دې یوه ورځ مخکې هند په لومړۍ نیمه پایلوبه کې اسټرالیا ته په څلورو وېکټو په ماتې ورکولو پایلوبې ته لاره ومونده.
د متحده عربي اماراتو په دوبۍ کې په هغه سیالۍ کې لومړۍ توپوهنه اسټرالیا وکړه او ټوله لوبډله یې په ۵۰م اوور کې په ۲۶۴ منډو وسوځېده. هندۍ لوبډلې ټاکلی هدف په ۴۹م اوور کې د شپږو لوبغاړو په زیان پوره کړ. وېرات کوهلي د سیالۍ غوره لوبغاړی شو.
د اتلانو جام په سیالیو کې اته غوره لوبډلو برخه واخیسته چې ورڅخه یې پاکستان، بنګلادېش، هند او نیو زیلینډ په الف او افغانستان، اسټرالیا، انګلستان او جنوبي افریقا په ب ګروپ کې دي.
ټاکل شوې چې د مارچ پینځمې د سیالۍ ګټونکې لوبډله د مارچ پر نهمه په دوبۍ کې له هند سره پایلوبه ولري.
