د جبري لادرکیو نړیواله ورځ: په اسلام اباد کې د بلوڅانو پرلت دوام لري
ملګري ملتونه د اګست ۳۰مه د جبري لادرکو کسانو د نړېوالې ورځې په توګه لمانځي. په پاکستان کې سږ کال دا ورځ په داسې حال کې لمانځل کېږي چې د ورکو بلوڅانو د کورنیو غړي نن هم په اسلام اباد کې په احتجاج ناست دي او له حکومته غوښتنه کوي چې خپلوان دې ورته پیدا کړي. دوی پخوا هم د دې غوښتنې لپاره احتجاجونه کړي دي خو دا تازه پرلت یې د جولای له ۱۶مې راهیسې پیل کړی دی. دوی وايي د کورنیو غړي یې له کلونو راهیسې ورک دي چې نه ورباندې کوم جرم ثابت شوی او نه عدالت ته وړاندې شوي دي. په پاکستان کې له شاوخوا دوو لسیزو راهیسې خلک ورکېږي چې زیاتره یې بلوڅان او پښتانه دي. پښتانه او بلوڅ ملتپاله سیاستوال او د بشري حقونو فعالان او غورځنګونه د پاکستان امنیتي او جاسوسي ادارې د خلکو په ورکولو تورنوي خو هغوی په پراخ کچ د خلکو د ورکولو تورونه ناسم بولي. د پاکستان د قانوني چارو وزیر اعظم نذیر تارړ تېر کال ویلي ول چې د ورکو کسانو مسله خورا پېچلې ده. ده ویلي ول چې په دې موضوع کې د دولتي بنسټونو ککړتیا نه شي ردېدای خو زیاته کړې یې وه چې په دې لړ کې یې کره شواهد نه دي ترلاسه کړي. د پاکستان پوځ البته په پراخ کچ د بلوڅانو ورکولو تور ردوي او دعوه کوي چې ډېری هغه کسان چې بې درکه بلل کېږي له وسلوالو ډلو سره یو ځای شوي او ځینې یې په عملیاتو او له امنیتي ځواکونو سره په نښتو کې وژل شوي دي. د بلوڅانو د یووالي کمېټۍ مشره ډاکتره ماهرنګ بلوڅه او یوشمېر نور مخکښ مشران او فعالان له مارچ راهیسې د عامه نظم ساتنې قانون له مخې بندیان دي. د جبري لادرکو کسانو د ورځې په اړه د مشال راډیو د خبریال راپور وګورئ.