د امریکا ولسمشر ډانلډ ټرمپ وايي چې په افغانستان کې د ۱۳ امریکايي سرتېرو د وژنې "عامل" نیول شوی دی.
دا خبره نوموړي د مارچ پر څلورمه په دويم ځل د ولسمشرۍ د دندې تر سمبالولو وروسته د کانګرس د دواړو جرګو ګډې غونډې ته په لومړنۍ وینا کې وکړه.
د ۲۰۲۱ز کال د اګست پر ۲۶مه د کابل له هوايي ډګر دباندې په دوو ځانمرګو بريدونو کې د ۱۳ امريکايي سرتېرو په ګډون لږ تر لږه ۱۷۰ افغانان ووژل شول. هغه بریدونه له افغانستانه د امریکايي ځواکونو او ګڼو افغانانو د وتلو په ګډوډۍ کې شوي ول چې ذمه واري یې د اسلامي دولت (داعش) خراسان څانګې منلې وه.
ټرمپ د کانګرس غونډې ته په وینا کې زياته کړه چې په هغه برید کې تورن کس د پاکستان په مرسته نیول شوی دی. "خوښ یم چې نن شپه د هغه ترهګر نیول کېدل اعلان کړم چې د [کابل په هوایي ډګر کې] د ظالمانه برید عمده مسول وو."
ټرمپ د پاکستان د حکومته مننه وکړه چې د هغه کس په نیولو کې یې مرسته کړې ده.
نوموړي په دې اړه نور تفصيل ور نه کړ چې دا کس څوک دی او پاکستان څنګه، کله او چېرته نيولی دی.
خو د پاکستان وزیراعظم شهباز شریف د مارچ پر پینځمه پر اېکس (پخواني ټوېټر) په بیان کې ویلي دي چې د "داعش د خراسان څانګې" نیول شوی "لوړپوړی قوماندان شریف الله" نومېږي چې "د افغانستان وګړی" دی.
شریف لیکلي چې هغه "مطلوب ترهګر" یې پر ډېورنډ کرښه د "بریالیو عملیاتو" پر مهال نیولی دی، خو دا یې نه دي ویلي چې عملیات مشخصاً چېرې او کله شوي ول.
د پاکستان وزیراعظم په بیان کې د ټرمپ مننه کړې چې په وینا یې، په "ترهګرۍ ضد هڅو کې" یې د اسلام اباد "رول او ملاتړ ستایلی" دی. هغه زیاته کړې چې د پاکستان مشرتابه او ولس د "ترهګرۍ ختمولو پوخ هوډ" کړی دی.
په همدې حال کې د امریکا د پلټنو وفاقي ادارې (اېف بي ای) کش پټېل ویلي دي چې هغه کس د مارچ څلورمې پر شپه د امریکا منګولو ته رسېدلی دی.
اخوا د طالبانو د حکومت ویاند ذبیح الله مجاهد د مارچ پر پینځمه په افغانستان کې د طلوع نیوز ټېلېوېژن په ګډون رسنیو ته ویلي دي چې په پاکستان کې د داعش د غړو نیول د دې ښکارندویي کوي چې هغې ډلې پاکستان ته "پناه وړې او هلته یې ځالې" جوړې کړي.
هغه زیاته کړې، دا موضوع په افغانستان پورې هېڅ اړه نه لري.
