د ۲۰ اووره کرکټ په يوې دوستانه سيالۍ کې د ښځو بې پولې لوبډلې افغان ښځينه لوبډلې ته په اووه وېکټو ماتې ورکړې ده.
د جنورۍ پر ۲۹مه د اسټراليا د مېلبورن ښار په جنکشن اوول کې شوې هغې سيالۍ کې د افغانستان د کرکټ ښځینه لوبډلې لومړی توپ وهنه وکړه او په ټاکل شويو ۲۰ اوورونو کې يې د نهو لوبغاړو په زيان ۱۰۳ منډې وکړې.
په ځواب کې د بې پولې ښځینه کرکټ لوبډلې په ۲۰م اوور کې د دریو لوبغاړو په زيان هدف بشپړ کړ او لوبه يې وګټله.
د افغان کډوالو ښځینه کرکټ لوبغاړې تر درې کلنې جلاوطنۍ وروسته د دې ۲۰ اووره لوبې لپاره یوځای شوې وې.
پر دې مهال د افغانستان د کرکټ ښځینه لوبډلې مشرې ناهیدې څپان وویل چې دا يې پیل دی او هیله لري چې په راتلونکي کې د افغانستان ملي بیرغ د افغانستان د کرکټ د نارینوو د ملي لوبډلې په څیر وځلوي.
د افغانستان د ښځو د کرکټ جلاوطنه لوبډلې له طالب چارواکو څخه وغوښتل چې افغان ښځو ته د زده کړو او ورزش کولو اجازه ورکړي.
