د خيبر پښتونخوا د خیبر ضلعې د ټولنیزې خیر ښېګړې صوبايي ادارې د جنورۍ پر ۲۹مه د جمرود په جرګه هال کې د سره صلیب د نړیوالې کمېټۍ ( ای سي ار سي) په مرسته د ۲۸۹ معذورانو معاینه کړې ده.
پر دې مهال ځینو معذورانو ته د بدن مصنوعي غړي لګول شوي او ځینو ته ګرځنده څوکۍ (سایکلونه) ورکړل شوې دي.
د هغې ضلعې د معذورانو د ټولنې مشر همدرد اپرېدي مشال راډیو ته وویل چې حکومت دې د دوی ستونزو ته ځانګړې پاملرنه وکړي.
هغه زیاته کړه، لکه څنکه چې په پنجاب صوبه کې معذورانو ته میاشتنۍ مرستې ورکول کېږي، د خیبر پښتونخوا حکومت دې همدغسې مرستې له دوی سره هم وکړي. "د تعلیم یافته معذورانو لپاره دې حکومت په نوکریو کې برخه وټاکي او بې تعلیمو ته دې د کسب زده کولو بندوبست وکړي."
دوی غوښتنه وکړه چې د "همت کارډ" په نوم دې معذورانو ته ځانګړي کارډونه ورکړل شي.
د وګړو د نوملیکنې، شناختي کارډونو او نورو اسنادو جوړولو ادارې (نادرا) د معلوماتو تر مخې په خیبر ضلع کې شاوخوا ۱۲،۰۰۰ کسانو ته د معذورۍ ځانګړي شناختي کارډونه ورکړل شوي دي.
