د رسنیو د ازادۍ د خوندیتوب یوه نړیواله اداره وايي چې د اسراییل او حماس ترمینځ په روانه جګړه کې تر اوسه لږترلږه ۶۵ خبریالان وژل شوي دي.
د انټرنیشنل پرېس انسټېټیوټ په نامه ادارې د ډېسېمبر پر ۳۰مه په یو بیان کې تور پورې کړ چې د دې لامل د اسراییلو له خوا په غزه کې "بې له ښه او بد کتلو بې رحمه بریدونه" دي.
په بیان کې ویل شوي دي چې په غزه کې د خبریالانو په ګډون ولسي وګړي خوراک، اوبو او درملو ته د کم لاسرسي له کبله له بشري ناورین سره مخامخ دي.
انټرنیشنل پرېس انسټېټیوټ پر اسراییلو غږ کړی دی چې د جګړې اصولو ته "درناوی" وکړي.
اسراییلو لا د هغې نړیوالې ادارې د تورونو او څرګندونو په غبرګون کې څه نه دي ویلي.
اسراييلیو ځواکونو په غزه کې د اکتوبر تر اوومې وروسته هوايي او ځمکني عمليات پيل کړل. پر هغه ورځ، حماس، چې امریکا او اروپايي ټولنه یې ترهګره ډله بولي، د اسراییلو پر جنوبي سیمو بریدونه وکړل، ۱،۲۰۰ اسراییلیان یې ووژل او شاوخوا ۲۴۰ تنه یې یرغمل کړل.
په غزه کې د حماس تر کنټرول لاندې روغتیايي چارواکي وايي، د ډېسېمبر تر ۲۵مې پورې په جګړه کې د وژل شويو فلسطينيانو شمېر تر ۲۰،۰۰۰ اوښتی دی.
