د خیبر پښتونخوا حکومت د صوبې په سرکاري طب کالجونو کې د افغان زده کوونکو لپاره په فیسونو کې په پراخه کچه کمی اعلان کړی دی.
د لوړو زده کړو په برخه کې د صوبې د اعلا وزیر سلاکار کامران بنګښ د جون پر ۱۱مه پر ټویټر د دې اعلان په اړه بیان خپور کړی دی.
کامران بنګښ په خپاره کړي بیان کې ویلي چې د خیبر پښتونخوا اعلا وزیر محمود خان دا ګام د پاکستان او افغانستان دوستۍ ته د ودې ورکولو او افغان زده کوونکو ته د غوره اسانتیاوو برابرولو لپاره اخیستی دی.
نوموړي لیکلي چې د خیبر پښتونخوا د طب کالجونه به له افغان زده کوونکيو څخه اوس کلنۍ فېس د اته لاکه پر ځای ۵۰،۰۰۰ روپۍ اخلي.
کامران بنګښ لیکلي، "افغان محصلین چې د خیبر پښتونخوا په دولتي طبي او د غاښونو په کالجونو کې زده کړې کوي، له هغوی به اوس کلنی فیس د اتو لاکو پر ځای ۵۰ زره اخیستل کېږي."
په خیبر پښتونخوا کې یو شمېر افغان زده کوونکو د خیبر پښتونخوا د حکومت د دې اعلان هرکلی کړی او هیله یې څرکنده کړې چې دوی ته به نورو اسانتیاوې هم برابرې کړل شي.
د پېښور خيبر ميډيکل يونيورسټۍ افغان زده کوونکي عنایت الله مومند د جون پر ۱۱مه مشال راډيو ته وویل چې دوی دا یو زېری ګڼي او د لا نورو اسانتياوو تمه کوي.
نوموړي زیاته کړه چې دا اقدام د دوی او په پېښور کې د افغان کونسلګرۍ د هلو ځلو وروسته پورته کړل شوی دی.
په پاکستان کې د طب له زده کړو یو بل فارغ شوي افغان ډاکټر شریف الله مشال راډیو ته وویل چې د ده په وینا د خیبر پښتونخوا د حکومت دا اعلان به د پاکستان او افغانستان ترمنځ په اړیکو کې واټڼ نور هم کم کړي.
د پاکستان حکومت د ۲۰۲۲م کال د فبرورۍ پر ۲۲مه د افغان زده کوونکو لپاره د علامه اقبال په نوم په مسلکي او نورو عادي پوهنتونو کې د ۳،۰۰۰ سکالرشپو اعلان کړی وو.
د پاکستاني حکومت له خوا بیا د مارچ په میاشت کې په دې کې ۱،۰۰۰ سکالرشپونه نور هم ورزیات کړل شو چې اوس یې شمېر ۴،۰۰۰ دی.
