د هند مرکز نوي دهلي کې د جنورۍ پر ۲۷مه په سوونو پوليس د تاريخي لال قلعې د امنيت لپاره ځای پر ځای شوي دي.
دا تر هغې وروسته ده چې د جنورۍ پر ۲۶مه په دغه ښار کې د کروندګرو او پوليسو ترمنځ نښتو کې يو کس مړ شوی او لږ تر لږه ۸۰ کسان ژوبل شوي ول.
د هند کروندګر چې زياتره د پنجاب صوبې دي وايي، د حکومت زرعي اصلاحاتو ګټه لوی کمپنيوو ته رسېږي. خو د هند حکومت دريځ لري چې زرعي اصلاحاتو سره به هېواد نور پرمختګ وکړي او کروندګرو ته به نوې موقعې ترلاسه شي.
رويټرز او فرانس پريس اژانسوانو د جنورۍ پر ۲۷مه خبر ورکړی چې د هند مرکزي ښار نوي دهلي کې په لسګونه زره کروندګر د حکومتي اصلاحاتو پرضد له دوو مياشتو راهيسې په احتجاج دي.
د جنورۍ پر ۲۶مه کروندګرو د احتجاج په توګه نوي دهلي ته ټريکټري وروړي وي. پر دې موقع له پوليسو سره نښتې وشوي. پوليسو پر احتجاج کوونکو اوښکې بهونګي ګيس او پر لارو د تګ راتګ مخنيوي لپاره خنډونه جوړ کړي وو.
د خبري اژانسونو ترمخه مظاهرچيان تاريخي لال قلعې ته ورسېدل او هلته يې خپل بيرغونه هم ولګول. دا په داسې حال کې وه چې د جنورۍ پر۲۶مه د هند جمهوريت ورځ لمانځلو په مناسبت وزيراعظم نريندرا مودي وينا کوله.
پوليسو د مظاهرچيانو پرضد ۲۲ مقدمې درج کړي دي.
