Ҳодиса
Боздошти се "зодаи Осиёи Марказӣ" бо гумони омодагӣ ба таркиш дар Русия
Хадамоти федеролии амнияти Русия (ФСБ) аз боздошти се шаҳрванди “Осиёи Марказӣ” хабар додааст, ки ба гуфтаи ин ниҳод қасди ҳамла дар вилояти Ставрополро доштанд.
Хадамоти федеролии амнияти Русия рӯзи ҷумъа дар баёнияе, гуфт, “аз амали террористии се шаҳрванди Осиёи Марказӣ”, ки мехостанд, бо истифода аз маводи тарканда дар як маҳалли серодами Ставропол таркиш анҷом диҳанд, ҷилавгирӣ кард.
Телевизиони Русия навори лаҳзаи боздошти чанд мардеро нишон дод, ки кормандони ФСБ онҳоро дар рӯйи замин хобондаанд. Ба навиштаи расонаҳои Русия дар хонаи яке аз гумонбарон маҳсулот барои омода кардани маводи тарканда пайдо шудааст.
Дар навор чеҳраи боздоштшудаҳо дида намешавад ва маълум нест онҳо аз кадом кишвари Осиёи Марказӣ ҳастанд
Боздошти се шаҳрванди ба қавли мақомоти рус Осиёи Марказӣ дар ҳолест, ки расо як ҳафта қабл дар ҳамлаи террористие дар Маскав 144 кас кушта шуд ва мақомоти рус дар изҳороти ахирашон гуфтанд, дар ин ҳамла 12 нафар гумонбар дониста мешаванд. Додгоҳ то кунун 9 нафари онҳоро ба ҳабс гирифт. Ҳашт нафар аз Тоҷикистон ва як нафар аз Қирғизистон будааст.
Достони онҳое, ки ҳангоми ҳамла ба "Крокус" ҷони даҳҳо касро наҷот доданд
Ҳангоми ҳамла ба "Крокус Сити Ҳолл"-и Маскав қаҳрамононе ҳам буданд, ки ҷони даҳҳо нафарро наҷот додаанд.
Дар наворе, ки дар шабакаҳои иҷтимоӣ зуд паҳн шуд, дида мешавад, ки чӣ гуна як писари 15-солаи қирғиз одамонро ба макони бехатар роҳнамоӣ мекунад. Ислом Халилов, ки дар гардероб ё либосхонаи "Крокус Сити Ҳолл" кор мекард, тақрибан 100 нафарро наҷот дод.
Ислом Халилов мегӯяд, одамон ба давидан ва доду фарёд сар карданд ва ӯ фаҳмид, ки бояд фавран амал кунад: "Ҳама чизро зуд анҷом додам. Ман дарк кардам, ки агар дар ҷоям биистам, ҷони худ ва ва садҳо нафари дигарро аз даст медиҳам."
Ойпарӣ Халилова, модари Ислом, гуфт, "аз он ки писарам сиҳату саломат баргашт, аз шодӣ гиря кардам. Ӯро ба оғӯш гирифта, Худои бузургро шукр гуфтам. Ӯ ба хона танҳо ва дар ҳолати шок омад. Вай меларзид. Баъд ман ӯро ором кардам."
Халилов мухлиси дастаи футболи "Спартак"-и Маскав аст. Вақте корнамоии ӯ расонаӣ шуд, клуб наврасро ба мулоқот бо бозигарон даъват карда, барояш нимтана ва билети доимиро барои тамошои бозиҳои ин даста тақдим намуд.
Репсарои шинохта Моргенштерн ба ҳисоби Ислом Халилов 1 миллион рубл гузаронд.
Писари 14-солаи рус Артём Донсков низ барои фирори мардум кумак расондааст. "Мардум ба як роҳе рафтанд, ки онҳоро ба бунбаст бурд. Ман ва рафиқонам ин ҳолатро дида, вазъиятро ба даст гирифтем. Мо онҳоро гардондем ва роҳи дурустро барои берун рафтан нишон додем," -- нақл кард ӯ.
Қаҳрамони дигар як марди узбек буд, ки дар "Крокус Сити Ҳолл" ҳамчун пешхидмат кор мекунад. Комил Насибов мегӯяд, ӯ тақрибан ба 80 нафар барои расидан то ба мошини "Ёрии таъҷилӣ" мадад расондааст.
Бунафшоҳ Эркинов низ ба осебдидагони ҳамла ёрӣ намуд. Ин ҷавони 17-солаи тоҷик дар меҳмонхонаи "Аквариум"-и Маскав пешхидмат аст. Ҳангоми ҳамла ба "Крокус Сити Ҳолл" даҳҳо нафар ба ин меҳмонхона паноҳ бурданд.
Меҳмонхонаи "Аквариум" аз "Крокус Сити Ҳолл" дар масофаи 300 метр дуртар ҷойгир аст. Бунафшоҳ ба осебдидагон кумаки аввалияи тиббӣ расондааст. Ин ҷавон сокини шаҳри Конибодом буда, дар Маскав кор мекунад.
Ҳамчунин ҷавонон аз созмони иҷтимоии тоҷикони Русия - "Нур" ба онҳое, ки барои осебдидагон хун месупурданд, чойи гарм ва хӯрок доданд.
Дар ёдгории худҷӯши гиромидошти хотираи қурбониён лавҳа ва гулчанбарҳое аз номи тоҷикон Русия гузошта шуд.
Рӯзи 22-юми март чаҳор шахси мусаллаҳ ба толори консертии "Крокус" дар канори шаҳри Маскав ворид шуда, бо силоҳи автоматӣ 139 нафарро куштанд. Бештар аз 200 нафари дигар захм бардоштанд.
"Вай як тарсончак буд." Нақли хешовандон дар бораи як гумонбари ҳамла ба "Крокус Сити"
Мақомоти Тоҷикистон рӯзи 25-уми март пайвандони Фаридуни Шамсиддин, яке аз гумонбарон ба ҳамлаи маргбор дар наздикии Маскавро барои бозпурсӣ бурдаанд.
Фаридуни Шамсиддин 25-сола ва аз деҳаи Лойоби Ҳисор аст. Як додгоҳи шаҳри Маскав шаби 24-уми март ӯро бо айби "амалиёти гурӯҳии террористӣ" ба ҳабси пешакӣ гирифт. Наздиконаш мегӯянд, ба иттиҳоми эълонкардаи мақомоти Русия бовар надоранд.
Яке аз пайвандони Фаридуни Шамсиддин, ки нахост номашро зикр кунем, рӯзи 25-уми март дар суҳбат бо Радиои Озодӣ гуфт: "Дар рафтораш ҳеч амали шубҳаовар надида будем. Шаш моҳ пеш ба Русия рафт ва ба хонаводааш пул мефиристод."
Фаридуни Шамсиддин дар навори бозпурсии мақомоти Русия дар ҳоле ки дастонаш баста ва дар замин ба зону зада буд, гуфт, 4-уми марти имсол аз Туркия ба Русия гузашт. Ба онҷо бо ҳадафи гузаштан аз сарҳад ва тамдиди будубошаш дар Русия рафта будааст.
Вай дар ҳамин бозпурсӣ гуфт, ки барои иҷрои ҳамлаи террористӣ аз ёвари як рӯҳонӣ “500 ҳазор рубл” гирифт. Каналҳои русӣ дар Телеграм рӯзи 23-юми март акси шиканҷа шудани ӯро бо барқ нашр карданд.
"Ӯ ба мисли як муҳоҷири одӣ рафтор дошт ва касе ба ӯ шубҳа надошт. Мо хабарро шунида, дар ҳолати шок афтодем. Як гунҷишкро кушта наметавонист ва хеле тарсончак буд," – илова кард ҳамсуҳбати мо.
Фаридуни Шамсиддин соли 2022 издивоҷ карда, як писари ҳаштмоҳа дорад. Ҳамсуҳбати мо мегӯяд, ин ҳодиса пайвандони ӯро дар ҳолати бисёр бад гузоштааст.
“Ҳоло ҳамсар, падару модар ва хушдоманашро ба Душанбе барои бозпурсӣ бурданд. Дар Маскав дар хонаи хоҳараш номнавис шуда буд. Язнааш талоқи хоҳарашро додааст. Мақомоти Русия ӯро субҳи ҳамин рӯз ба далели дар хонааш номнавис кардани Фаридун бо се кӯдакаш аз Русия ихроҷ карданд. Хоҳараш, Маҳбуба Заргарова, шоми имрӯз бояд ба Тоҷикистон бирасад,” -- гуфт ӯ.
Ба нақли ин хешованди Фаридуни Шамсиддин, ӯ то Русия рафтан дар як нонвойхонаи шаҳри Ҳисор кор мекард ва "на намоз мехонд, на рӯза медошт".
Ба иттилои дарёфтии Радиои Озодӣ, ӯ пештар ба иттиҳоми озори ҷинсӣ дар Тоҷикистон аз озодӣ маҳрум шуда, соли 2020 озод гардидааст. Ба хидмати ҳарбӣ низ нарафтааст.
Мақомоти Тоҷикистон дар бораи ин шаҳрванди худ ва иттиҳоми эълоншуда нисбат ба ӯ ҳарфе нагуфтаанд. Дар ҳоле ки Вазорати корҳои дохилӣ рӯзи 23-юми март ба нашри маълумот дар бораи чор гумонбари ҳамла аз Тоҷикистон зуд вокуниш кард ва даст доштани се нафари онҳоро дар ин қазия рад намуд.
Видеоро дар инҷо бинед:
Ҳамла ба толори мусиқии “Crocus City Hall" дар наздикии шаҳри Маскав шоми 22-юми март сурат гирифт. 137 нафар кушта ва беш аз 180 тани дигар маҷрӯҳ шудаанд.
Мақомоти Русия гуфтанд, 11 нафарро дастгир карданд. Додгоҳи Басманнии шаҳри Маскав шаби 24-уми март чаҳор зодаи Тоҷикистонро ба гумони даст доштан дар ҳамла ба ҳабси пешакӣ гирифт.
Навори бозпурсии онҳо, ки бо шикнаҷа сурат гирифтааст, суолҳоро дар бораи то куҷо воқеӣ будани иқрори онҳо доғ кардааст. Сарнавишти гумонбарони дигар феълан маълум нест.
Намоҳо аз ҳамла ба толори консертии Маскав
Дар ин аксе, ки Кумитаи Тафтишоти Русия рӯзи 23 март нашр кард, силоҳи мусалсали Калашников дар рӯйи фарши толори консертии Crocus City Hall дида мешавад, ки пас аз ҳамла ин ҷо мондааст.
Афроди мусаллаҳ шоми 22 март онҳоеро ҳадафи тир қарор доданд, ки ба тамошои консерт дар толоре дар канораи Маскав омада буданд. Дар ин ҳамлаи ваҳшатафканона зиёда аз 80 нафар кушта ва беш аз 100 кас захмӣ шуданд. Грууҳи "Давлати Исломӣ" ҷавобгарии ин ҳамларо бар дӯш гирифт.
ВКХ: Хабари ҳамлаи шаҳрвандони Тоҷикистон дар Русия "дурӯғин аст"
Мақомоти Тоҷикистон хабарҳоеро "дурӯғин" номид, ки гӯё дар ҳамлаи 22 март ба толори консертӣ дар Маскав шаҳрвандони Тоҷикистон даст доранд. Ин дар ҳолест, ки бархе аз Телеграм-каналҳои Русия ҳамлаваронро шаҳрванди Тоҷикистон номидаанд.
Мақомоти Тоҷикистон аз расонаҳо даъват карданд, ки дар пахши хабарҳои тасдиқношуда оид ба ин ки гӯё дар ҳамла ба толори консертие шоми 22 март шаҳрвандони Тоҷикистон даст доранд, “бомасъулият рафтор кунанд”. ВКХ Тоҷикистон бо пахши хабаре дар саҳифаи фейсбукии худ хост, ба иттилои расмии мақомоти Русия такя кунанд.
“Таъкид мекунем, ки ҷониби Тоҷикистон аз мақомоти Русия ҳеҷ итилое расмие дар бораи хабари дурӯғини даст доштани шаҳрвандони Тоҷикистон дар ин ҳамла, ки ҳоло паҳн мешавад, дарёфт накардааст”, мегӯяд ВКХ Тоҷикистон. Ин вазорат гуфтааст, паҳн кардани хабари тасдиқношуда метавонад ба шаҳрвандони Тоҷикистон, ки дар хориҷа қарор доранд, осеб расонад.
Дар бораи ин ки гӯё ҳамла кори дасти шаҳрвандони Тоҷикистон ва узви гурӯҳи даҳшатафкани ДОИШ мебошанд, чанд вебсайти наздик ба хадамоти ҳифзи қонуни Русия хабар нашр карданд. Дар ин расонаҳо аксу маълумот дар бораи шаҳрвандони Тоҷикистон чоп шудааст, вале дақиқ нест, онҳо дар ин ҳамла даст доштаанд ё не. Ҳамчунин, раиси Кумитаи Думаи давлатӣ оид ба сиёсати иттилоотӣ Александр Хинштейн дар як изҳороташ дар Телеграм канал навишт:
"Ходимони ҳифзи қонун ду гумонбари эҳтимолии масъули ҳамлаи террористӣ ба "Крокус сити холл" дар вилояти Маскавро боздошт карданд, дигаронро ҷустуҷӯ доранд. Дар дохили мошин тапончаи ПМ, тирдони автомати АКМ ва шиносномаҳои шаҳрвандони Тоҷикистон ошкор шуд».
Ба навиштаи ӯ: "Аз рӯи иттилои пешакӣ, мошини "Рено", ки дар он гумонбарон ҳаракат мекарданд, шабона дар атрофи деҳаи Хатсуни ноҳияи Карачински вилояти Брянск ошкор шуд. Мошин амри полисро гӯш накарда фирор намуд". Ба навиштаи Хинштейн, дар ҷараёни фирор гӯё тирандозӣ сурат гирифт ва мошин чаппагардон шуд. "Як террорист дар ҷои ҳодиса боздошт ва дигарҳо дар ҷангал пинҳон шуданд. Дар паи ҷустуҷӯ тахминан соати 3:50 дақиқаи субҳ гумонбари дуюм боздошт гардид. Ҷустуҷӯи дигарон идома дорад".
Феълан тасдиқи ин хабарҳо тавассути манобеъ мӯътамади расмӣ имкон надорад.
Хадамоти федеролии амнияти Русия (ФСБ) гуфт, дар пайванд ба ҳамла 11 нафар, аз ҷумла 4 ҳамлавар боздошт шудаанд. Аммо ӯ тафсилоти бештар надод.
Дар ҳамла ба "Крокус Сити" дар наздикии Маскав 62 кас кушта ва беш аз 100 кас захмӣ шудаанд. Сухангӯи Вазорати умури хориҷии Русия онро "ҳамлаи хунини террористӣ", аммо бахши иктишофии Вазорати дифои Украина "иғво" номид. ДОИШ масъулиятро пазируфтааст.
Намоҳо аз ҳамла ба толори консертии Маскав
Даҳҳо кушта ва беш аз 100 захмӣ. Ҳамла ба толори мусиқӣ дар Маскав
Хадамоти федеролии амнияти Русия (ФСБ) гуфт, дар ҳамла ба "Крокус Сити" дар наздикии Маскав 62 кас кушта ва беш аз 100 кас захмӣ шудаанд. Сухангӯи Вазорати умури хориҷии Русия онро "ҳамлаи хунини террористӣ", аммо бахши иктишофии Вазорати дифои Украина "иғво" номид. ДОИШ масъулиятро пазируфтааст.
Ҳодиса шоми 22-юми март, пеш аз оғози консерти дастаи мусиқии "Пикник" рӯй дод. Бино ба хабари расонаҳо, шахсони мусаллаҳ бо либоси ҷангӣ ба толори консертии "Крокус Сити" дар ноҳияи Красногорски наздикии Маскав даромада, норинҷак ё "коктейли Молотов" таркондаву мардумро аз силоҳ парондаанд.
Баъзе аз расонаҳо як мардро масъули ҳодиса медонанд. "РИА Новости" навишт, ки ҳамлаварон камаш се нафар буданд. Хабаргузории "Интерфакс" онҳоро на камтар аз панҷ нафар гуфтааст.
Бинои "Крокус Сити" аз тарафи нерӯҳои зиддиошӯби Русия муҳосира шудааст. Кумитаи тафтишотӣ парванда боз кард.
Дар ҳамин ҳол, ба иттилои хабаргузории "Рейтерс", гурӯҳи тундрави "Давлати исломӣ" ё ДОИШ бо нашри баёнияе дар Телеграм масъулияти ҳамларо ба толори консертӣ дар канори Маскав ба дӯш гирифтааст. Мақомоти Русия то ҳол дар ин бора ибрози назар накарданд.
Расонаҳои байнулмилалӣ, аз ҷумла Sky News ва Reuters бо иқтибос аз баёнияи гурӯҳи “Давлати исломӣ” навиштанд, ки ҷангҷӯён "ба як ҷамъомади калон дар канори пойтахти Русия ҳуҷум карданд". Ба иттилои ин манобеъ, дар изҳороти ДОИШ гуфта шудааст, ки "ҳамлаварон ба пойгоҳҳои худ баргаштанд". Аз ин пеш расонаҳои Русия дар бораи ҳанӯз дар озодӣ будани ҳамлаварон ҳушдор дода буданд.
Дар наворҳои паҳншуда дар шабакаҳои иҷтимоӣ дидан мумкин аст, ки аз як маҳаллаи канори Маскав чӣ гуна алангаи оташ ва дуд берун меояд. Расонаҳои Русия гуфтаанд, даҳҳо мошини “Ёрии таъҷилӣ” дар ҷойи ҳодиса ҳастанд.
"Имрӯз дар маркази тиҷоратии "Крокус Сити" як фоҷиаи даҳшатбор рух дод", - навишт шаҳрдори Маскав Сергей Собянин дар Телеграм. Вай ба наздикони қурбониён ибрози ҳамдардӣ карда, гуфтааст, ҳама гуна барномаҳои варзишӣ, ҳунарӣ ва фарҳангӣ дар рӯзҳои шанбе ва якшанбе дар Маскав лағв шуданд.
Дмитрий Песков, сухангӯйи президенти Русия Владимир Путин, гуфт, раҳбари Кремлро "дар лаҳзаҳои аввал" аз ҳодиса хабардор карданд ва ӯ "дар бораи чораҳои андешидашуда пайваста маълумот мегирад." "Путин тамоми дастурҳои заруриро додааст," -- афзуд ӯ.
Мария Захарова, сухангӯйи Вазорати корҳои хориҷии Русия, аз ҷомеаи ҷаҳонӣ хост, ин ҳамлаи, ба гуфтаи ӯ, "хунини террористӣ"-ро маҳкум кунанд.
Сафорати Амрико дар Маскав рӯзи 7-уми марти имсол аз хатари ҳамлаҳои террористӣ дар пойтахти Русия ҳушдор дода, аз шаҳрвандони Иёлоти Муттаҳида хоста буд, ки ба ҷойҳои серодам нараванд. Ҳушдори ба ин монанд дертар аз ҷониби чанд кишвари дигари ғарбӣ садо дод.
Путин рӯзи 19-уми март изҳороти кишварҳои ғарбиро дар бораи эҳтимоли ҳамлаҳои террористӣ дар Русия "иғвогарона" ва ҳадафи онро "тарсондан" ва "бесубот кардани ҷомеа" номида буд.
Сарраёсати иктишофии Вазорати дифои Украина, ки тақрибан 25 моҳ боз алайҳи ҳамлаи густурдаи Русия мубориза мебарад, бе пешниҳоди далеле ҳамларо ба "Крокус Сити" иғвои сохта ва ё барқасдонаи худи режими Путин номид, ки ба дасти хадамоти махсуси ин кишвар иҷро шудааст.
Михайло Подоляк, мушовири аршади раиси ҷумҳури Украина Владимир Зеленский, гуфт, кишвараш ба ин ҳамла "ҳеч иртибот надорад" ва "ҳеч гоҳ аз усулҳои террористӣ истифода накардааст". Аммо ҳамзамон ҳушдор дод, ки ин ҳодисаи маргбор "ба афзоиши якбораи таблиғоти низомӣ, густариши сафарбаркунӣ ва дар ниҳоят васеъ кардани миқёси ҷанг мусоидат хоҳад кард".
Дабири кулли Созмони Милал Антонио Гутерриш гуфтааст, ҳамларо "ба сахттарин шева" маҳкум мекунад. Иёлоти Муттаҳида, Фаронса, Туркия, Итолиё, Иттиҳоди Аврупо низ ин ҳодисаро маҳкум карданд.
Иттиҳоди Аврупо гуфт, "аз ин хабар таконзада ва ваҳшатзада шуд" ва "ҳар гуна ҳамларо ба ғайринизомиён маҳкум мекунад".
Вазорати корҳои хориҷии Фаронса ҳодисаи охирро дар Маскав "даҳшатовар" номид ва хост, ки барои "маълум кардани сабабҳои ин амали зишт тамоми талошҳо ба харҷ дода шавад". Вазорати корҳои берунаи Тоҷикистон низ ин ҳамларо қатъиян маҳкум кард ва ба наздикони қурбониён изҳори ҳамдардӣ намуд.
Сарвазири Итолиё ҳамларо "амали нафратангези террористӣ" номид ва маҳкум кард.
"Даҳҳо оиларо ба ҷои амн бурданд." Пайомади сел дар гӯшаҳои Тоҷикистон
Боронҳои пайиҳами ду рӯзи охир сабаби омадани сел дар баъзе аз гӯшаҳои вилояти Хатлон ва ноҳияҳои атрофи пойтахти Тоҷикистон шудааст.
Бино ба наворҳои фиристодаи корбарон ба Радиои Озодӣ, сел роҳ, пул ва ҳавливу заминҳои киштро дар чанд минтақа, аз ҷумла ноҳияҳои Хуросон, Абдураҳмони Ҷомӣ, Рӯдакӣ, Ҳисору Шаҳринав ва шаҳри Ваҳдат вайрон кардааст.
Дар Кумитаи ҳолатҳои фавқулода рӯзи 22-юми март тасдиқ карданд, ки “сел тақрибан ба 15 ҳавлӣ ва як Корхонаи истеҳсоли пахта дар ноҳияи Абдураҳмони Ҷомӣ зарар расонд. Бинои як дидбонгоҳи Хадамоти давлатии оташнишониро дар ноҳияи Темурмалик вайрон кард.”
Мақомот гуфтанд, дар бораи талафоти ҷонӣ гузориш нарасидааст, аммо бист хонаводаро дар шаҳри Ваҳдат, бист оиларо дар ноҳияи Хуросон ва панҷоҳ нафарро дар ноҳияи Абдураҳмони Ҷомӣ ба ҷойи амн кӯчонданд, то аз хатар эмин бошанд.
Ҳанӯз зиёни расида аз сел муайян нашудааст.
Ҳавои номусоид дар Тоҷикистон то рӯзи 27-уми март мемонад. Дар ин муддат хатари фаромадани тарма низ ҳаст.
Тоҷикистон ҳар сол дар айёми баҳор шоҳиди омадани сел мешавад. Ҳар дафъа хонаву роҳҳо вайрон мегарданд ва бархе ҷони худро аз даст медиҳанд.
Ба иттилои расмӣ, дар сӣ соли охир, селу заминларза ва лағжиши хок ба 7 миллион нафар осеб ва ба иқтисоди кишвар зиёда аз 2 миллиард доллар зарар расондааст.
Қатли бонкдори тоҷик. Эълони ҳукми Дилшод Саидмуродов ва ҳамроҳонаш
Додгоҳи олии Тоҷикистон панҷ касро барои рабудан ва қатли Шӯҳрат Исматуллоев, муовини аввали раиси "Ориёнбонк” ба ҳабси абад маҳкум кард.
Ҳукм рӯзи 18-уми март дар Боздоштгоҳи муваққатии Душанбе содир шудааст. Дафтари матбуоти Додгоҳи олӣ эълони ҳукмро тасдиқ кард, аммо гуфт ҷузъиёти онро дертар ироа мекунад.
Ду манбаи аз ҳам ҷудо рӯзи 18-уми март ба Радиои Озодӣ гуфтанд, додрас
- Дилшод Саидмуродов (Дилшоди СБ);
- Қамар Азизов;
- Акбар Аҳмадов;
- Бахтовар Сафаров ва
- Шоҳрух Хӯҷаевро ба ҳабси якумрӣ маҳкум кард.
Бар асоси ҳукми додгоҳ, амволи баъзе аз онҳо, аз ҷумла Дилшод Саидмуродов мусодира мешаванд. Пайвандони Саидмуродов дар суҳбат ба Радиои Озодӣ гуфтанд, ки аз ҳукми додгоҳ норозианд.
Ба гуфтаи манобеи Радиои Озодӣ, нуҳ каси дигар бо иттиҳомҳои гуногун, аз ҷумла хабар надодан дар бораи ҷиноят аз 1 то 8 сол зиндонӣ шудаанд.
Муҳокимаи муттаҳамон дар қатли Шӯҳрат Исматуллоев дар аввали моҳи январи имсол аз тарафи додраси Додгоҳи олӣ оғоз шуд. Мурофиаҳо дар Боздоштгоҳи муваққатӣ гузаштанд ва барои ҳамин гирифтани иттилоъ дар бораи он чӣ дар дохил мегузарад, мушкил буд.
Юсуф Раҳмон, додситони кулли Тоҷикистон, дар моҳи феврали имсол ҳангоми нишасти хабарӣ гуфт, дар робита ба рабудан ва қатли Шӯҳрат Исматуллоев ба зидди 18 кас парванда кушодаанд. Аз инҳо 14 нафар дар курсии айбдорӣ нишастаанд, ду нафарашон дар кофтукоб ва ду гумонбари дигар фавтидаанд.
Ба иттилои расмӣ Шӯҳрат Исматуллоевро 23-юми июни соли 2023 аз назди хонааш дар шаҳри Душанбе рабуда, баъд аз шиканҷа ба қатл расондаанд. Ҷасадашро 13-уми август аз дарёи Зарафшон ёфта, дар Душанбе дафн карданд. Шермуҳаммад Шоҳиён, раиси Додгоҳи олӣ 15-уми феврал гуфт, ангезаи ин ҳодиса пул аст.
Рабудан ва қатли Шӯҳрат Исматуллоев, муовини аввали раиси "Ориёнбонк", ки раҳбараш Ҳасан Асадуллозода, додарарӯси президенти Тоҷикистон аст, яке аз қазияҳои пурсарусадо дар соли 2023 буд.
Ин қазия ба сабаби наздикии Шӯҳрат Исматуллоев бо хонаводаи президент шубҳаву гумон ва фарзияҳои зиёдеро ба миён овард, вале молики "Ориёнбонк" расман ҳеч гуна шарҳ ё раддияе нашр накардааст.
"Таслим намешавам." Ҳамла ба яке аз ёрони Навалний дар Литва
Ба Леонид Волков, яке аз ёрони сиёсатмадори мухолифи Русия Алексей Навалний (моҳи феврал дар шароити мармуз дар зиндон фавтид) дар Вилнюс, пойтахти Литва, ҳамла шудааст.
Мақомоти амниятии Литва рӯзи 13-уми март ҳамларо “иғвогарона” ва “эҳтимол” кори дасти Маскав донистанд, то ба ин восита мухолифону мунтақидони президент Владимир Путинро дар хориҷа ва бахусус кишварҳои Балтика битарсонанд.
Ҳамла ба Леонид Волков шоми 12-уми март иттифоқ уфтодааст. Ӯро бо путк ё болға задаву дасташро шикастаанд ва осебҳои дигар расондаанд.
Президенти Литва Гитанас Науседа гуфт, рӯшан аст, ки ҳамла тарҳрезишуда буд. "Ман ба Путин танҳо як чиз мегӯям: дар ин ҷо касе аз Шумо наметарсад," – афзуд ӯ ҳангоми шарҳи ҳодиса.
Леонид Волков, раиси пешини ситоди Алексей Навалний ва раиси собиқи Бунёди мубориза бо фасоди ӯ аз соли 2019 дар Литва кору зиндагӣ мекунад. Вай чанд соат пеш аз ҳамла ба расонаи мустақили “Meduza” гуфта буд, ки пас аз эълони марги Навалний дар шароити шубҳаовар аз амнияти худ бештар нигарон аст.
Бо вуҷуди ин, Волков ваъда дод, ки ба мубориза ба зидди Путин идома хоҳад дод. Ӯ баъд аз ҳамла ва баромадан аз бемористон низ дар наворе дар Telegram гуфт: "Ман ба корам идома медиҳам ва таслим намешавам".
"Онҳо мехостанд маро ба гӯштпора табдил диҳанд. Марде дар рӯйи ҳавлии хонаам ба ман ҳамла кард. 15 бор ба поям зад, аммо он солим аст. Ҳангоми роҳ гаштан дард дорад, вале мегӯянд, нашикастааст. Ӯ дастамро шикаст", - гуфт Волков ва илова кард, ки ин “як паёми возеҳ ва хоси Путин аст".
Хабаргузории “Meduza” аз қавли рӯзноманигор Сергей Пархоменко навиштааст, Леонид Волков дар як маҳаллаи хурде дар канори Вилнюс мезист. Пулис роҳро ба ҷойи ҳодиса баста, ба таҳқиқ идома медиҳад.
Вазири корҳои хориҷии Литва дар шабакаи “X” навишт, ки "гунаҳкорон бояд барои ҷинояти кардаашон ҷавоб диҳанд." Раиси Кумитаи умури хориҷӣ дар порлумони Литва гуфт, ҳамла ба Волков баёнгари он аст, ки Литва бояд аз сиёсатмадорон ва мухолифони Русия ва Беларус, ки муқими ин кишвар ҳастанд, пуштибонӣ кунад ва амнияти онҳоро таъмин намояд.
Вакил ва вазири пешини Литва Гидриус Сурплис гуфт, Путин "танҳо ёдрас кард, ки дасти дароз дорад ва ҳатто Литва, ки ба паноҳгоҳи мухолифони Русия ва Беларус табдил шудааст, амн нест."
"Ҳамла ба интихоботи наздики президентӣ дар Русия пайванд дорад. Путин дар онҷо бо куштани Навалний дар зиндон қудраташро нишон дод ва ҳоло онро дар хориҷа ба намоиш гузошт," – афзуд ӯ.
Дар бораи ҳамла аввал Кира Ярмиш, сухангӯйи собиқи Алексей Навалний ва дабири Бунёди мубориза бо фасоди ӯ (ФБК) хабар дод. Вай дар шабакаи “Х” навишт, ки як шахси ношинос тирезаи мошинаи Волковро шикаста, пеш аз зарба задан бо путк ба чашмонаш гази ашковар пошидааст.
Сафияхони 9-соларо аз Узбекистон оварда дафн карданд
Баъд аз 34 рӯз пайкари Сафияхон Раҳматоваи 9-соларо аз ҳудуди Узбекистон ёфтанд ва 13-уми март дар яке аз қабристонҳои Хуҷанд дафн карданд.
Хонаводааш бар асоси як навори дурбини назоратӣ бовар доштанд, ки ӯ дар дарёи Сир ғарқ шуда буд ва ҷустуҷӯяш беш аз як моҳ идома дошт.
Имомхатиб Абдуҳафиз Аҳадов ҳангоми дафни ӯ гуфт: “Аз рӯзе, ки мусибат ба сари ин хонадон омад, аз дӯстону пайвандону аҳли маҳалла дар паҳлӯи Саидаъзамхон истоданд. Бисёр талош карданд, шабу рӯз заҳмат кашиданд, то ба Узбекистон рафта, дар кофтукобаш бетараф набуданд.”
Кумитаи ҳолатҳои фавқулода рӯзи 13-уми март дар эъломияе гуфт, маъмурони наҷоти Узбекистон ҷасади Сафияхонро “дар соҳили канали Мирзочӯли Ҷанубӣ” ёфтаанд. Ин канал аз ҳудуди шаҳри Ширини вилояти Сирдарё мегузарад.
Дар Идораи ҳолатҳои фавқулодаи вилояти Суғд гуфтанд, даҳ рӯз пеш ба унвонии Кумитаи ҳолатҳои изтирории Узбекистон нома фиристода буданд, то дар ёфтани ҷасади навраси тоҷик мадад кунанд.
Рӯзи пайдо гардидани наврас пайвандонаш дар сӯҳбати телефонӣ гуфтанд, ки ӯро аз либосаш шинохтаанд. Аммо дар рӯзи дафн омода нашуданд, дар назди дурбин сӯҳбат кунанд.
Сафияхон Раҳматова рӯзи 7-уми феврали имсол нопадид шуд. Сабти дурбинҳои назоратӣ бори охир ӯро дар кӯчаи ба номи Раҳмон Набиеви шаҳри Хуҷанд нишон дод. Дар ин кӯча ҳавлии Раҳматовҳо ҷойгир аст ва дар рӯбарӯи он дарёи Сир мегузарад.
Аъзамхон Раҳматов, падари Сафияхон, аз аввал ба ин бовар буд, ки духтараш ғарқ шудааст. Бо дархости ӯ ҷустуҷӯро дар дарёи Сир идома доданд, вале маъмурони наҷот ҳар дафъа мегуфтанд, ки нишоне аз ӯ наёфтанд. Дар ин байн акс ва хабари гум шудани духтарчаи нуҳсола дар шабакаҳои иҷтимоӣ дареғ ва ғамшарикии ҳазорон нафарро ба миён оварда буд.
Ғарқ шудани сокинон дар дарёи Сир ё Сайҳун ҳодисаи нав нест. Танҳо дар соли 2023 панҷоҳу панҷ мавриди ғарқшавӣ сабт шудааст. Дар ин миён 19 нафар ноболиғ будаанд. Ҳанӯз чор ҷасад пайдо нашудааст.
Видеоро дар инҷо бинед:
Як сокини Душанбе мегӯяд, ӯро "заданд" ва "ахта" карданд. Баҳси қарз ё осеби равонӣ?
Идибек Нусратов, сокини шаҳри Душанбе, даъво дорад, ки аз тарафи ду ҳамсояи ҷавонаш латукӯб ва шиканҷа шуд, аммо маъмурони милиса шикояти ӯро нодида мегиранд. Ҳодиса ҳафт моҳ пеш рӯй додааст. Нозири маҳаллӣ шикоятро беасос донист. "Агар ҷиддӣ таҳқиқ мешуд, ҳама чиз ошкор мешуд," -- гуфт Идибек.
Идибек Нусратови 35-сола рӯзи 7-уми март дар суҳбати видеоӣ ба Радиои Озодӣ гуфт, баъд аз он ки мақомот шикояташро ҷиддӣ нагирифтанд, мехоҳад ҳодисаро ба матбуот нақл кунад. Ҳарчанд, ба гуфтааш, ифшои ин роз осон нест.
"Ба ду ҳамсояи ҷавонам қарз дода будам. Онҳо маро ба суҳбат даъват карданд. Фикр кардам, пулро бармегардонанд, аммо заданд ва телефонамро гирифтанд. Даҳону дасту поямро бастанду заданд. Маъюбам карданд," – нақл кард ӯ.
Вай мегӯяд, дар натиҷаи латукӯб узви таносулаш осеб дид ва ба ин сабаб пизишкон моядонашро ҷарроҳӣ кардаанд: "Як муддат дар хона муолиҷа гирифтам, фикр кардам, ки беҳ мешавад, аммо нашуд. Ҳамроҳи модарам ба бемористони Қарияи Боло рафтем. Пизишкон диданд. Гуфтам, изи сигарет ҳаст, милисаро даъват кунед. Накарданд."
Идибек Нусратов мегӯяд, барои он латукӯб шуд, ки қарзи додаашро аз ду ҳамсояи ҷавонаш талаб кард. Ба қавли ӯ, ба онҳо 20 ҳазор рубли русӣ дод ва то ҳоло онро пас гирифта наметавонад.
Тарафи дигари қазия инро рад кард. Раҳмоналӣ Фахриддинов, сокини шаҳри Душанбе, рӯзи 7-уми март дар суҳбат ба Радиои Озодӣ гуфт, гапҳои Идибек нисбат ба ӯ "беасос аст".
"Ягон бор аз ӯ қарз нагирифтам. Ин масъаларо дар назди мардум исбот карда натавонист. Кадоме ӯро задааст, ба гардани мо зад. Ариза навишт, ба шуъбаи корҳои дохилӣ рафтем, онҷо ҳам исбот карда натавонист. Ягон бор ҳамроҳи ин одам на ҷанг кардем, на даст бардоштем. Туҳмат мекунад. Мехоҳам мақомот барои ин туҳматҳояш нисбат ба ӯ чора андешанд," – гуфт ӯ.
Идибек ва Раҳмоналӣ дар маҳаллаи Навбаҳори ноҳияи Синои пойтахт зиндагӣ мекунанд. Милисаи маҳаллӣ гуфт, аз шикояти Идибек Нусратов хабар дорад ва “ҳангоми таҳқиқ исботи худро наёфт”. Нозир дақиқ посух надод, ки ҷароҳати бадани даъвогар аз куҷост, аммо дар суҳбати бидуни сабт таъкид кард, ки "вазъи рӯҳиву равонияш чандон хуб нест".
Пизишкони бемористони Қарияи Боло гуфтанд, асаби мард "каме хароб шудааст", вале аз лиҳози равонӣ "мушкили ҷиддӣ надорад".
Дар беморхона таъкид намуданд, ки Идибекро бо шикояти латукӯб ва осеб дидани моядон қабул карда, табобат кардаанд. Ба гуфтаи пизишкон, "шикояти ӯ дар мавриди олоти таносулаш ба асаб рабт дошта, ӯ набояд худро дар ҳолати афсурдагии зиёд қарор диҳад".
Идибек Нусратов ба ин хулосаи табибон розӣ нест ва пофишорӣ дорад, ки латукӯб ва осеби дидааш ӯро ба чунин ҳол расондааст. Ин сокини Душанбе дар мавриди латукӯб шудан хулосаи пизишкӣ надорад, зеро ба гуфтааш, "он шабу рӯз вазъи саломатӣ хуб набуд ва дар манзил табобат мегирифтам".
Вай соҳиби се фарзанд аст ва ҳоло дар ҷое кор намекунад. Дар гузашта дар муҳоҷирати корӣ дар Русия будааст. Ҳоло аз вазъи саломаташ нигарон аст ва мехоҳад латукӯби ӯ мунсифона таҳқиқ шавад.
Гузориши видеоиро дар инҷо бинед:
Наздиконаш гуфтанд, ҷасади Сафияхон дар Узбекистон "ёфт шудааст"
Пайвандонаш гуфтанд, ҷасади Сафияхон Раҳматоваи 9-сола аз Хуҷанд, ки ба бовари онҳо дар дарёи Сир ғарқ шуда буд, дар ҳудуди Узбекистон ёфт шудааст. Дар Идораи ҳолатҳои фавқулода дар вилояти Суғд хабарро тасдиқ карда, аммо ҷузъиёт надоданд.
Муяссар Раҳматова, бибии Сафияхон, шоми 12-уми март ба Радиои Озодӣ гуфт, ба онҳо хабар расид, ки ҷасади духтарашонро ёфтаанд, вале ҳанӯз пайкар шиносоӣ нашудааст. Алҳол либосҳо далели тахмин задани он шудаанд, ки он Сафияхон аст.
"Аз либосаш шинохтаанд ва ӯ дар панҷараи обанбор дармонда будааст. Падараш ва наздикони дигар барои гирифтани ҷасад ба Узбекистон рафтанд. Бояд фардо ҳуҷҷатҳоро омода карда, ба Тоҷикистон биёранд," – гуфт ӯ.
Дар Идораи ҳолатҳои фавқулодаи вилояти Суғд гуфтанд, даҳ рӯз пеш ба унвонии Кумитаи ҳолатҳои изтирории Узбекистон нома фиристода буданд, то дар ёфтани ҷасади навраси тоҷик мадад кунанд. Аз ин бештар ҷузъиёт надоданд.
Сафияхон Раҳматова рӯзи 7-уми феврали имсол нопадид шуд. Сабти дурбинҳои назоратӣ бори охир ӯро дар кӯчаи ба номи Раҳмон Набиеви шаҳри Хуҷанд нишон дод. Дар ин кӯча ҳавлии Раҳматовҳо ҷойгир аст ва дар рӯбарӯи он дарёи Сир мегузарад.
Аъзамхон Раҳматов, падари Сафияхон, аз аввал ба ин бовар буд, ки духтараш ғарқ шудааст. Бо дархости ӯ ҷустуҷӯро дар дарёи Сир идома доданд, вале маъмурони наҷот ҳар дафъа мегуфтанд, ки нишоне аз ӯ наёфтанд. Мақомот дар ин муддат ҳеч гоҳ тасдиқ накарда буданд, ки наврас дар дарё ғарқ шудааст.
Ғарқ шудани сокинон дар дарёи Сир ё Сайҳун ҳодисаи нав нест. Танҳо дар соли 2023 панҷоҳу панҷ мавриди ғарқшавӣ сабт шудааст. Дар ин миён 19 нафар ноболиғ будаанд. Ҳанӯз чор ҷасад пайдо нашудааст.
Гузориши видеоӣ аз рӯзи 12-уми феврал
Манбаъҳо: Додситон ба Дилшод Саидмуродов ва Қамар Азизов ҳабси абад хост
Манбаъҳои Радиои Озодӣ мегӯянд, додситон барои гумонбарон дар парвандаи қатли Шӯҳрат Исматуллоев, муовини пешини раиси "Ориёнбонк", солҳои дарози зиндон талаб кардааст. Аз ҷумла, ҳабси якумрӣ барои Дилшод Саидмуродов, машҳур бо лақаби "Дилшоди СБ" ва соҳибкор Қамарруззамон Азизов.
Як манбаи огоҳ аз парванда рӯзи 12-уми март ба Радиои Озодӣ гуфт, дар умум додситон барои чор гумонбар ҳабси якумрӣ ва барои даҳ нафари дигар аз 3 то 14 сол зиндон хостааст.
"Гумонбарон танҳо ба куштани Шӯҳрат Исматуллоев муттаҳам нестанд. Ба зидди баъзе аз онҳо барои хабар надодан ё пинҳон доштани ҷиноят парванда боз кардаанд ва барои ҳамин ҷазояшон камтар аст," -- афзуд ҳамсуҳбати Радиои Озодӣ.
Манбаи дувум дар Додгоҳи олии Тоҷикистон ҳам тасдиқ кард, ки "баъд аз талаби додситон, додрас ба хонаи машваратӣ рафт". Ба гуфтаи ӯ, "рӯзҳои наздик ҳукми додгоҳ нисбат ба 14 нафар содир мешавад".
Назари ҷонибҳо ба ҷараёни мурофиа ва талаби додситон маълум нест.
Муҳокимаи муттаҳамон дар қатли Шӯҳрат Исматуллоев дар аввали моҳи январи имсол аз тарафи додраси Додгоҳи олӣ оғоз шуд. Мурофиа дар Боздоштгоҳи муваққатӣ мегузарад ва барои ҳамин гирифтани иттилоъ дар бораи он чӣ дар дохил мегузарад, мушкил аст.
Юсуф Раҳмон, додситони кулли Тоҷикистон, дар моҳи феврали имсол ҳангоми нишасти хабарӣ гуфт, дар робита ба рабудан ва қатли Шӯҳрат Исматуллоев ба зидди 18 кас парванда кушодаанд. Аз инҳо 14 нафар дар курсии айбдорӣ нишастаанд, ду нафарашон дар кофтукоб ва ду гумонбари дигар фавтидаанд.
Яке аз онҳо Рустам Ашӯров дар моҳи июни соли 2023 ҳангоми кӯшиши даромадан ба Молдова дар фурудгоҳи Кишинёв ду нафарро кушт ва худаш ҳам чанд рӯз баъд дар бемористон даргузашт.
Гумонбари дигар Парвиз Мустафоқулов 27-уми августи соли гузашта дар боздоштгоҳе дар Душанбе даргузаштааст. Мақомот сабаби марги ӯро "пневмонияи музмини шушҳо" гуфтанд, аммо иттилои алтернативӣ дар ин бора дар даст нест.
Ба иттилои расмӣ Шӯҳрат Исматуллоевро 23-юми июни соли 2023 аз назди хонааш дар шаҳри Душанбе рабуда, баъд аз шиканҷа ба қатл расондаанд. Ҷасадашро 13-уми август аз дарёи Зарафшон ёфта, дар Душанбе дафн карданд. Шермуҳаммад Шоҳиён, раиси Додгоҳи олӣ 15-уми феврал гуфт, ангезаи ин ҳодиса пул аст.
Рабудан ва қатли Шӯҳрат Исматуллоев, муовини аввали раиси "Ориёнбонк", ки раҳбараш Ҳасан Асадуллозода, додарарӯси президенти Тоҷикистон аст, яке аз қазияҳои пурсарусадо дар соли 2023 буд.
Ин қазия ба сабаби наздикии Шӯҳрат Исматуллоев бо хонаводаи президент шубҳаву гумон ва фарзияҳои зиёдеро ба миён овард, вале молики "Ориёнбонк" расман ҳеч гуна шарҳ ё раддияе нашр накардааст.
Ҳалокати се узви як оила аз дуди ангишт дар Тоҷикистон
Бар асари заҳролудшавӣ аз дуди ангишт се нафар дар деҳаи Турушбоғи ҷамоати Хонақоҳи Кӯҳии Ҳисор, канори шаҳри Душанбе, ҷон бохтаанд.
Кумитаи ҳолатҳои фавқулода рӯзи 6-уми март дар эъломияе гуфт, онҳо аъзои як оила ҳастанд.
Ҳодиса шаби 5-уми марти имсол рӯй додааст. Ҷузъиёт дар даст нест.
"Ба наздикони ҷонбохтагон изҳори ҳамдардӣ карда, бори дигар аз мардум даъват менамоем, ки тамоми қоидаҳои бехатариро риоя кунанд. Бухорӣ ва дудбароҳоро тафтиш кунед!" -- гуфта шудааст дар эъломияи Кумита.
Ҳафтаи гузашта аз дуди ангишт шаш узви як оила, аз ҷумла чаҳор кӯдак, ҷон бохтанд.
Онҳо дар маҳаллаи Гравзавод, дар ҳудуди ноҳияи Фирдавсии пойтахт, мезистанд. Ҳодиса дар рӯзҳои сарду бебарқӣ дар Тоҷикистон рӯй дод ва боис ба вокунишҳои зиёд шуд.
Масъулони Кумитаи ҳолатҳои фавқулода гуфтанд, ки Музаффар Давлатови 38-сола ва ҳамсару кӯдаконаш аз дуди ангишт фавтиданд. Наздикони марҳум мегӯянд, онҳо дар тағора чӯб ва резина рӯшан карда будаанд.
Ба гуфтаи ҳамсояҳо, кормандони мақомот дар ҷои ҳодиса буданд, вале натиҷаи таҳқиқи марги аъзои ин хонавода эълон нашудааст.
Бори аввал нест, ки дар рӯзҳои сард сокинон аз дуди ангишт мефавтанд. 8-уми декабри соли 2023 се узви як оила, аз ҷумла як кӯдак дар шаҳри Душанбе бар асари заҳролудшавӣ аз дуди ангишт ҷон бохтанд.
Дар оғози соли гузашта дар ноҳияи Кушониёни вилояти Хатлон як зану шавҳари ҷавон бар асари дуди ангишт дар дохили ҳаммом фавтиданд.
Сокинони Тоҷикистон дар тирамоҳу зимистон барқи доимӣ надоранд ва маҷбуранд барои гарм кардани хона аз ангишт истифода баранд. Аммо ин усули гармкунии хона барои бархе бо қимати ҷонашон тамом мешавад.
"Қарор бекор шуд." Таҳқиқи дубораи худкушии ду духтар дар Суғд
Додситонии вилояти Суғд худкушии ду духтарро дар Панҷакент дигарбора ба баррасӣ гирифтааст. Ҳодиса моҳи сентябри соли 2023 рух дод ва сабаби сару садои зиёд шуд. То ҳол ангезаи воқеа маълум нест.
Масъулони Вазорати корҳои дохилӣ чанд рӯз баъди ҳодиса гуфта буданд, ки дар ҷасад аломати марги маҷбурӣ нест, аммо духтарон дасти ҳамдигарро баста буданд. Фурқат Хоҷазода, додситони вилояти Суғд, дар моҳи феврали имсол гуфт, пас аз анҷоми таҳқиқ ва қарори ниҳоии додрас ҷузъиёти онро ошкор хоҳанд кард.
"Қарори аввал аз тарафи Додситонии вилоят бекор карда шуд. Аз сари нав барои санҷиши иловагӣ фиристода карда шуд ва айни замон мавриди тафтиш қарор дорад," -- афзуд ӯ.
Ҷасади ду духтари ҳабдаҳсоларо, ки ба далелҳои ахлоқӣ ному насабашон гуфта намешавад, пас аз ташхис дар охири моҳи сентябри соли гузашта дафн карданд. Лаҳзаи ба об афтодани духтарон дар дурбинҳои назоратӣ сабт гардидааст. Пайвандон ва мақомоти маҳаллӣ дар бораи сабаби воқеа чизе нагуфта буданд.
Акбар Шарифов, сухангӯйи Раёсати умури дохилии вилояти Суғд, он ҳангом дар суҳбат ба Радиои Озодӣ гуфта буд, “ҳарду донишҷӯйи Коллеҷи омӯзгории шаҳри Панҷакент ҳастанд. Дар ҷасадҳо нишонаи марги маҷбурӣ дида нашудааст, вале дасти ҳамдигарро бо банди халат баста буданд.”
Чизе, ки воқеаро асроромез кардааст, дастони бастаи онҳо ва якҷоя дар об ғарқ шуданашон аст. Ба иттилои дарёфтӣ, наврасон зодагони деҳаи Шаршараи ҷамоати Чинори Панҷакент ҳастанд. Пештар дар шабакаҳои иҷтимоӣ гуфта мешуд, ки онҳо хоҳарон ё хешони наздиканд.
Як масъули ҷамоат дар суҳбат бо Радиои Озодӣ рӯзи 19-уми сентябр гуфт, онҳо дар як синф нуҳ сол хонда, якҷо ба Коллеҷи педагогӣ дохил шудаанд. Ҳарчанд аз тарафи модарӣ хешони дур буданд, бештар бо ҳам дӯстии наздик доштаанд.
Дар шарҳи ҳодиса гумонҳое ҳадс зада мешуд, ки духтарони наврас мушкили хонаводагӣ доштанд ва барои худ роҳи наҷотро ҷустаанд. Чанд ҳамсуҳбати мо аз деҳаи Шаршара дар бораи ин оилаҳо гуфтанд, онҳо миёнаҳол буда, падарони ҳарду духтар ҳам дар муҳоҷирати кориянд.
Мақомоти Кумитаи кор бо занон бар пояи таҳлили солҳои охир гуфта буданд, ки масъалаи худкушӣ аз ҳама бештар дар вилояти Суғд нигаронкунанда аст.
Тобистони соли 2022 аз соҳили рӯди Сир ҷасади занеро бо ду кӯдакаш пайдо карданд ва дертар маълум шуд, ки сокини 27-солаи ноҳияи Бобоҷон Ғафуров худро бо духтари панҷмоҳа ва писари шашсолааш ба рӯд партофтааст.
Додситонии вилояти Суғд нисбати хушдоман ва дигар аъзои хонаводаи шавҳар “барои ба худкушӣ расониданӣ” зан парванда боз карданд.
Ҳар сол дар Тоҷикистон даҳҳо нафар, бештар занону духтарон ба ҷони худ қасд мекунанд. Равоншиносон мушкили иҷтимоӣ, нофаҳмӣ дар оила, фишор ва масъалаҳои номусиро аз сабабҳои ин падида меноманд. Чунин ҳодисаҳо камтар таҳқиқ ва расонаӣ мешаванд.
