Бозии дӯстона байни тимҳои миллии футзали Тоҷикистон ва Испания 5-уми сентябр соати 20:00 дар маҷмааи варзишии «Кохи Олимп»-и Душанбе доир мегардад. Дар остонаи ин бозӣ дар меҳмонхонаи «Атлас»-и Душанбе бо иштироки намояндагони дастаҳо ҷаласа ва нишасти хабарӣ баргузор шуд.
Дастаҳо дар бозии дӯстона ранги либоси худро муайян карданд. Мунтахаби Тоҷикистон бо либоси сурх ва тими Испания бо либоси сафед бозӣ мекунанд.
Сипас нишасти матбуотӣ доир гардид, ки дар он сармураббиёни мунтахаби Тоҷикистону Испания Пайрав Воҳидов ва Феде Видал, инчунин бозигарон Самандар Ризомов ва Раул Кампос ба саволҳои рӯзноманигорон посух доданд.
Чунончи, мураббии тими миллии Тоҷикистон Пайрав Воҳидов гуфт, ки бозиҳои дӯстона бо дастаҳои Испания ва Нидерланд пеш аз Ҷоми ҷаҳон-2024 хеле муфид хоҳад буд. Самандар Ризомов иброз дошт, ки мекӯшанд муқобили тимҳои пурқуввати Испания ва Нидерланд бозии хуб нишон диҳанд.
Баъдан, рӯзи шанбеи 7-уми сентябр бозии дӯстона миёни дастаҳои мунтахаби Испания ва Нидерланд барпо мегардад.
Силсилаи бозиҳои дӯстона бо рақобати тимҳои миллии Тоҷикистону Нидерланд рӯзи якшанбеи 8-уми сентябр ба поён мерасад.
Ҳамаи бозиҳо дар маҷмааи варзишии «Кохи Олимп»-и Душанбе соати 20:00 шуруъ мешаванд. Нархи билет барои тамошои ҳар як бозӣ 100 сомонӣ муқаррар шудааст.
Бозиҳои дӯстонаи дастаҳои мунтахаб дар Душанбе
5-уми сентябр (панҷшанбе)
Оғози бозӣ – соати 20:00
Тоҷикистон – Испания
Душанбе, маҷмааи варзишии «Кохи Олимп»
7-уми сентябр (шанбе)
Оғози бозӣ – соати 20:00
Испания – Нидерланд
Душанбе, маҷмааи варзишии
«Кохи Олимп»
8-уми сентябр (якшанбе)
Оғози бозӣ – соати 20:00
Тоҷикистон – Нидерланд
Душанбе, маҷмааи варзишии «Кохи Олимп»
Ёдовар мешавем, даҳумин мусобиқаи қаҳрамонии ҷаҳон оид ба футзал аз 14-уми сентябр то 6-уми октябри имсол дар се шаҳри Узбекистон - Тошканд, Бухоро ва Андиҷон – баргузор мешавад.
Мунтахаби Тоҷикистон дар марҳилаи гурӯҳии Ҷоми ҷаҳон-2024 дар гурӯҳи «Е» бо дастаҳои яккачини Марокаш (16-уми сентябр), Португалия (19-уми сентябр) ва Панама (22-юми сентябр) бозӣ мекунад.
