Të nderuar lexues të Radios Evropa e Lirë,
Këtu përmbyllim mbulimin e drejtpërdrejtë të zhvillimeve pas sulmit të SHBA-së ndaj Iranit.
Faleminderit që na ndoqët!
Trump: Pse të mos ketë një 'ndërrim regjimi' në Iran?
Presidenti amerikan, Donald Trump, të dielën shtroi çështjen e mundësisë për ndryshimin e regjimit në Iran, pas sulmeve të fundjavës nga ushtria amerikane ndaj caqeve ushtarake kyçe iraniane.
“Nuk është politikisht korrekte të përdorësh termin ‘ndërrim regjimi’, por nëse regjimi aktual iranian nuk është në gjendje TA BËJË IRANIN MADHËSHTOR SËRISH, atëherë pse të mos ketë ndërrim regjimi??? MIGA!!!”, shkroi Trump në platformën e tij sociale.
Postimi në platformën Truth Social përbënte një lëkundje nga qëndrimi zyrtar i shprehur më herët gjatë ditës nga Sekretari amerikan i Mbrojtjes, Pete Hegseth, në një konferencë për media ku dha detaje mbi sulmet ajrore.
“Ky mision nuk ishte dhe nuk është për ndërrimin e regjimit”, deklaroi Hegseth.
Netanyahu: Izraeli “shumë, shumë pranë” arritjes së objektivave ndaj Iranit
Izraeli është “shumë, shumë pranë” përmbushjes së objektivave të tij ndaj Iranit, pas urdhrit të presidentit amerikan Donald Trump për bombardime gjatë natës mbi objektet bërthamore, deklaroi të dielën kryeministri izraelit Benjamin Netanyahu.
Duke përsëritur qëllimet e tij për të shkatërruar kapacitetet bërthamore dhe raketore të Iranit, Netanyahu tha në një konferencë për media:
“Po lëvizim hap pas hapi drejt arritjes së këtyre objektivave, jemi shumë, shumë pranë përmbushjes së tyre”.
Ai shtoi se “kur këto objektiva të jenë arritur, operacioni do të përfundojë.”
Çfarë pas sulmeve të SHBA-së ndaj Iranit?
Ndërsa pluhuri po ulet mbi Fordo dhe dy objekte të tjera të goditura nga SHBA-ja, ditët në vijim do të tregojnë çfarë nënkupton saktësisht kjo ngjarje...
A do të shpërthejë një luftë e plotë? A do të hakmerret Irani duke goditur bazat amerikane në rajon? A do të përpiqet Teherani të bllokojë furnizimet globale të naftës përmes ngushticës së Hormuzit? A do të vazhdojë Izraeli me bombardimet e paprecedenta ndaj objektivave iraniane? Dhe, a po hyn SHBA-ja në një tjetër luftë të madhe në Lindjen e Mesme?
Analizon gazetari i Radios Evropa e Lirë, Mike Eckel:
