Sulmet e SHBA-së ndaj Iranit: Goditje për Rusinë apo mundësi për Putinin?
Vendimi i presidentit amerikan, Donald Trump, për të kryer sulme ndaj Iranit paraqet njëkohësisht rrezik dhe mundësi për presidentin rus, Vladimir Putin: sulmet goditën një partner strategjik të Moskës, por mund të hapin një dritare të re për rëndësinë diplomatike të Rusisë.
Pas sulmeve të SHBA-së ndaj nyjeve kyç të kompleksit bërthamor iranian, Teherani po kthen sytë nga Moska.
Artikullin e plotë e gjeni më poshtë:
Grossi: Është i paqartë dëmi i shkaktuar në Fordo
Përderisa është e qartë se sulmet amerikane goditën centralin nëntokësor bërthamor të Iranit, Fordo, ende nuk ka mundësi që të vlerësohet dëmi i shkaktuar atje.
Kështu tha për CNN, kreu i Agjencisë Ndërkombëtare Bërthamore, Rafael Grossi.
Inspektorët e kësaj agjencie të OKB-së nuk kanë mundur të inspektojnë këtë central bërthamor që nga sulmet e para ajrore të kryera nga Izraeli më 13 qershor ndaj Iranit. Grossi tha se shpreson që ekipi i tij të mund të shkojë në këtë impiant nëntokësor sa më shpejt për të vlerësuar dëmet e shkaktuara.
Ai tha se nuk mund të përjashtohet mundësia që në Fordo ka dëme të mëdha.
Grossi shtoi se “ne duhet të kthehemi në tavolinën e bisedimeve sa më shpejt që të jetë e mundur, inspektorët duhet të jenë në gjendje të kthehen në objektet bërthamore të Iranit.
Pamjet satelitore tregojnë centralin Fordo para dhe pas sulmeve
Irani: Nuk mund të shkatërrohen njohuritë në fushën bërthamore
Irani tha se njohuritë në fushën bërthamore “nuk mund të shkatërrohen”, pasi SHBA-ja tha se ka shkatërruar ambiciet nukleare të Republikës Islamike.
“Ata duhet ta dinë se kjo industri ka rrënjë në shtetin tonë dhe rrënjët e kësaj industrie kombëtare nuk mund të shkatërrohen”, tha zëdhënësi i Organizatës për Energji Bërthamore të Iranit, Behrouz Kamalvandi, sipas agjencisë Tasnim.
“Sigurisht, ne kemi pësuar dëme, por nuk është hera e parë që kjo industri pëson dëme”, shtoi ai.
Fordo, para dhe pas sulmeve
Në fotogalerinë e mëposhtme mund të shihni imazhet satelitore që shfaqin centralin bërthamor Fordo, para dhe pas sulmeve të SHBA-së.