Pengjet izraelite lirohen, Trump dhe liderët botërorë nënshkruajnë planin për paqe në Gazë

Presidenti i Egjiptit, Abdel Fatah al-Sisi, gjatë konferencës për media në Sharm el-Sheik, tha se palestinezët “kanë të drejtë për vetëvendosje dhe të aspirojnë për një të ardhme kur lufta të mos i ndjekë më”.

Sipas tij, palestinezët kanë të drejtë “të shijojnë lirinë dhe të jetojnë në një shtet të tyre të pavarur, një shtet që do të jetonte në paqe pranë Izraelit, me siguri dhe njohje të ndërsjellë”.

Pas Sisit, Trump nisi fjalimin e tij në konferencën e samitit për paqe. Ai tha se për këtë ditë njerëzit “kanë punuar, kanë shpresuar dhe janë lutur”.

Sipas udhëheqësit amerikan, “marrëveshja historike” që nënshkroi me udhëheqësit e shteteve të rajonit, nënkupton se “lutjet e miliona njerëzve më në fund janë dëgjuar”.

Trump dhe Egjipti, Katari dhe Turqia nënshkruan planin për paqe në Gazë, por po ashtu shtoi se me këtë është arritur edhe paqe në mbarë Lindjen e Mesme.

Komiteti Ndërkombëtar i Kryqit të Kuq ka konfirmuar se ka lehtësuar procesin e pengjeve të gjalla për në Izrael, të palestinezëve të burgosur për në Gazë dhe Bregun Perëndimor, por edhe të mbetjeve mortore të pengjeve që mbaheshin në Gazë.

"Kryqi i Kuq ka transferuar mbetjet mortore të katër pengjeve tek autoritetet izraelite", u tha në njoftim.

Më herët, Izraeli tha se ishte informuar se Hamasi - grupi palestinez i shpallur organizatë terroriste nga SHBA-ja dhe BE-ja - kishte dorëzuar mbetjet mortore të pengjeve të vdekur te Kryqi i Kuq.

Gjatë fjalimit në samitin për paqe në Egjipt, Trump tha se në Gazë duhet të krijohet një forcë e re policore.

“Ne po ashtu jemi pajtuar se rindërtimi i Gazës kërkon që zona të çarmatoset, në mënyrë që një forcë policore civile të lejohet të krijojë kushte të sigurta për njerëzit në Gazë”, tha ai.

Pas konferencës, Trump njoftoi se takimi me udhëheqësit do të vazhdojë prapa dyerve të mbyllura.