Pengjet izraelite lirohen, Trump dhe liderët botërorë nënshkruajnë planin për paqe në Gazë

Presidenti amerikan, Donald Trump, tha se Egjipti ka luajtur “rol të rëndësishëm” për marrëveshjen për lirimin e pengjeve, teksa nisi takimin me kreun e shtetit, Abdel Fatal al-Sisi.

I pyetur nga gazetarët në Egjipt se kur do të nisin bisedimet për fazën e dytë të bisedimeve për planin e tij 20 pikësh për Gazën, Trump konfirmoi se ato veçse kanë nisur.

Ndërkaq, presidenti i Egjiptit tha se do që të sigurohet që armëpushimi në Gazë të respektohet.

Trupat e dy pengjeve të vdekura izraelite, që po mbaheshin në Gazë, i janë dorëzuar Kryqit të Kuq nga Hamasi – grupi palestinez i shpallur organizatë terroriste nga SHBA-ja dhe BE-ja – tha ushtria izraelite.

Ushtria shtoi se mbetjet mortore edhe të dy pengjeve po ashtu pritet të transferohen.

“Sipas informacioneve të dhëna nga Kryqi i Kuq, dy arkivole me pengje të vdekur janë transferuar nën kujdesin e tyre dhe janë në rrugë drejt forcave [izraelite] në Rripin e Gazës”, tha ushtria izraelite.

Shërbimi i burgjeve i Izraelit tha të hënën se ka liruar pothuajse 2.000 persona, shumica të ndaluar palestinezë, si pjesë e marrëveshjes së armëpushimit në Gazë.

Sipas njoftimit, “1.968 terroristë u transferuan nga disa burgje në mbarë vendin në burgjet Ofer dhe Ktziot. Pas miratimeve përkatëse, ata u liruan në Bregun Perëndimor dhe Jerusalemin Lindor”.

Në samitin për paqe në Egjipt, presidenti amerikan, Donald Trump, nënshkroi dokumentin për planin për paqe në Gazë, me Egjiptin, Turqinë dhe Katarin.

Në këtë samit po marrin pjesë mbi 20 udhëheqës nga shtetet më të fuqishme të botës.

Në Egjipt, Trump nisi fjalimin duke treguar se çfarë dokumenti po nënshkruajnë.

“Ne do të nënshkruajmë një dokument që do të shpalosë detaje të shumë rregullave dhe gjëra të tjera. Është dokument shumë gjithëpërfshirës”, tha ai.

Ndërkaq, duke e nënshkruar dokumentin ai tha: “U deshën 3.000 vjet të arrinim në këtë pikë. A mund ta besoni? Do të respektohet”, tha ai.