Trump nis fjalimin në Parlamentin e Izraelit
Presidenti amerikan, Donald Trump është pritur me duartrokitje dhe festë në Parlamentin e Izraelit në Jerusalem, teksa e ka nisur fjalimin.
“Vend i mirë, njëmend vend i mirë”, ka thënë ai.
“Jemi mbledhur në një ditë gëzimi të thellë dhe shprese të madhe”.
“Pas dy vjetëve të tmerrshëm në errësirë dhe robëri, 20 pengje guximtare po kthehen te familjet e tyre. Edhe 28 tjerë po vijnë në shtëpitë e tyre për të gjetur paqen në këtë vend të shenjtë”.
“Armët kanë rënë në heshtje dhe rajoni është në paqe”, ka thënë mes tjerash Trump.
Lot gëzimi dhe festë teksa palestinezët takojnë të burgosurit e liruar
Ndërkohë në Ramallah të Gazës kanë arritur dy autobusë me të burgosurit palestinezë që janë të liruar nga burgjet izraelite.
Nënat dhe baballarët janë parë duke qarë nga gëzimi pasi janë takuar me fëmijët e tyre.
Një pjesë e mirë e tyre kanë pasur dënime me burgime të përjetshme.
Disa janë parë me plagë dhe kanë pasur vështirësi që të ecin, andaj janë dërguar në spitalet e mbetura funksionale për t’u trajtuar.
Netanyahu: Sa gjatë e kemi pritur këtë moment
Para se presidenti amerikan, Donald Trump të flasë në Parlamentin izraelit, kryeministri Benjamin Netanyahu ka thënë se 13 tetori “do të shkruhet në histori” dhe që edhe presidenti Trump “do të jetë përgjithmonë në historinë e kombit tonë” dhe të botës.
“E kemi pritur gjatë këtë moment, dhe dua t’ju falënderoj personalisht në emër të gjithë kombit”, i ka thënë Netanyahu, Trumpit.
Ai i ka falëndëruar Shtetet e Bashkuara për mbështetjen e ofruar ndaj Izraelit përgjatë gjithë kohës.
“Donald Trump është miku më i mirë që shteti i Izraelit ka pasur ndonjëherë në Shtëpinë e Bardhë”, ka thënë ai.
Ai e ka përshkruar planin e Trumpit për paqe si hap të rëndësishëm drejt paqes.
“Jam i përkushtuar për këtë paqe, ju jeni të përkushtuar për paqe dhe së bashku do të arrijmë paqe”, ka thënë ai mes tjerash gjatë fjalimit.
Ai ka thënë se beson që Trump do të ndihmojë që Izraeli t’i normalizojë marrëdhëniet me më shumë shtete arabe.
Netanyahu nuk merr pjesë në samitin në Egjipt
Ndonëse ka pasur ftesë për të marrë pjesë në samitin ndërkombëtar në Egjipt për të diskutuar paqen në Gazë dhe Lindjen e Mesme, zyra e kryeministrit izraelit, Benjamin Netanyahu ka bërë të ditur se ai nuk do të jetë aty, për shkak të periudhës së afërt me festën hebreje Sukkot.
“Kryeministri e ka falënderuar presidentin Trump për përpjekjet e tij për ta zgjeruar qarkun e paqes – paqen përmes forcës”, është thënë në deklaratë.
Ndonëse ka armëpushim në Gazë, një marrëveshje për paqe afatgjatë ende duhet diskutuar.
Në samit do të marrin pjesë rreth 20 liderë botërorë, përfshirë liderë të Francës, Britanisë, Italisë dhe Spanjës.