Duartrokitje të gjata për zyrtarët amerikanë në Parlamentin e Izraelit
Fjalimet tashmë kanë nisur në Parlamentin e Izraelit, ku do të flasë edhe presidenti amerikan, Donald Trump.
Në objekt janë edhe disa zyrtarë të lartë amerikanë – përfshirë Sekretarin e Shtetit, Marco Rubio dhe atë të Luftës, Pete Hegseth - të cilët janë pritur me duartrokitje të gjata.
Gëzimi për kthimin e palestinezëve në shtëpi
Mediat janë duke raportuar se ka shumë palestinezë që kanë arritur në spitalin Nasser në Gazë, për t’i parë familjarët që janë liruar nga burgjet izraelite.
Ata e kanë përshkruar të hënën si ditë të bukur dhe të mbushur me gëzim.
Zyrtarë palestinezë kanë bërë të ditur se 38 autobusët e parë me të ndaluar nga burgjet izraelite tashmë kanë kaluar në territorin e Gazës.
Familjarët nisin të takohen me pengjet
Omri Miran, 48-vjeçar, është parë duke u bashkuar me gruan e tij Lishay në pikën fillestare të pritjes në jug të Izraelit.
Omri është marrë peng nga shtëpia e tij në Nahal Oz më 7 tetor 2023.
Lishay pati thënë se e ka parë për herë të fundit duke e larguar me makinë.
Në prill të vitit 2025, Hamasi – grup i shpallur terrorist – e pati publikuar një video kur shihej Omri duke shënuar ditëlindjen e 48-të.
Lishay pati thënë prej atëherë se e ka ditur që Omri ka mbijetuar.
Çfarë ka ndodhur deri më tani?
Pengjet izraelite
- Të gjitha 20 pengjet e gjalla izraelite janë liruar nga Hamasi - grup i shpallur terrorist nga Shtetet e Bashkuara dhe fuqi tjera.
- Ato kanë qenë të ndara në dy grupe – fillimisht janë liruar shtatë persona në mëngjes dhe 13 tjerë më vonë gjatë ditës.
- Trupat e atyre që kanë vdekur ende nuk i janë dorëzuar Izraelit.
Të burgosurit palestinezë
- Mbi 1.700 të ndaluar nga Gaza dhe 250 të burgosur palestinezë pritet të lirohen sot nga autoritetet izraelite.
- Disa automjete janë parë duke bartur njerëz nga burgu Ofer në Izrael.
- Spitalet në Gazë janë duke u përgatitur për kthimin e tyre.
Donald Trump
- Presidenti amerikan, Donald Trump ka arritur në Parlamentin e Izraelit, ku do ta mbajë një fjalim.
- Ai do të takohet edhe me familjarë të pengjeve, para se të niset për në Egjipt për të nisur samitin për paqe në Lindje të Mesme.
- Në samit pritet të marrin pjesë 20 liderë të shteteve më të fuqishme në botë.