Ushtria izraelite i pranon pengjet e para
Ushtria e Izraelit ka bërë të ditur se i ka pranuar shtatë pengjet e para.
Ajo i ka publikuar emrat e tyre në rrjete sociale me mbishkrimin “Mirë se vini në shtëpi”.
Sapo të arrijnë në Izrael, pengjet do t’iu nënshtrohen kontrolleve mjekësore, ka thënë ushtria.
Si nisi konflikti në Gazë?
Gjithçka ka filluar më 7 tetor të vitit 2023, kur militantë të Hamasit – grupit terrorist – e kanë sulmuar jugun e Izraelit, duke lënë të vrarë rreth 1.200 njerëz dhe duke marrë peng 240 të tjerë.
Izraeli, më pas, ka nisur fushatë ushtarake për ta shkatërruar Hamasin dhe për pasojë në Gazë besohet të kenë vdekur mbi 66 mijë persona, kryesisht gra dhe fëmijë.
Lufta e ka bërë pothuajse rrafsh me tokë Gazën dhe banorët janë në zi buke, sipas grupeve ndërkombëtare për ndihma.
Palët kanë një histori konfliktesh në të kaluarën. Më shumë hollësi në video.
Irani nuk merr pjesë në samit, pavarësisht ftesës
Ministri i Jashtëm i Iranit, Abbas Araghchi, ka bërë të ditur se nuk do të marrë pjesë në samitin për paqe në Egjipt, pasi refuzon të “angazhohet me homologët” që i sulmojnë njerëzit e Iranit.
Më herët gjatë këtij viti, në qershor, Izraeli pati nisur sulme ndaj objekteve ku ruhen raketat iraniane, duke e nxitur Iranin të hakmerret me raketa dhe dronë drejt qendrës së Izraelit.
Më pas, edhe Shtetet e Bashkuara kanë kryer sulme kundër programit bërthamor të Teheranit.
Megjithatë, ministri iranian ka thënë se vendi i tij e mirëpret çdo iniciativë që i jep fund konfliktit në Gazë.
Kush do të marrë pjesë në samitin për paqe në Gazë?
Samiti do të mbahet në Egjipt.
Presidenti amerikan, Donald Trump dhe ai i Egjiptit, Abdul Fattah al-Sisi do të jenë në krye të bisedimeve.
Në mesin e liderëve tjerë janë: kryeministri britanik, Keir Starmer, presidenti francez, Emmanuel Macron, kancelari gjerman, Friedrich Merz, kryeministrja italiane, Giorgia Meloni dhe kryeministri spanjoll, Pedro Sanchez.
Në takim do të marrë pjesë edhe Sekretari i Përgjithshëm i Kombeve të Bashkuara, Antonio Guterres.
Aty pritet të jetë edhe presidenti i Autoritetit Palestinez, Mahmoud Abbas, për ta finalizuar marrëveshjen që i jep fund luftës në Gazë, ka bërë të ditur zyra e tij.