Çitaku: Kjo seancë është e paligjshme
Deputetja Vlora Çitaku tha për media në Kuvend se Partia Demokratike e Kosovës nuk do të marrë pjesë në seancën për buxhetin.
“Kjo seancë, edhe sikur mos të ishte skemë për ta mbuluar krizën në të cilën po e fut vendin Qeveria në ikje, është e paligjshme dhe tërësisht në kundërshtim me rendin kushtetues të Kosovës”, tha Çitaku.
Ajo tha se kjo seancë është “farsë, nuk është zgjidhje, por tentim për ta mbuluar dështimin”, nga Lëvizja Vetëvendosje.
Zemaj: LDK-ja nuk merr pjesë në këtë proces të papërgjegjshëm
Deputeti Armend Zemaj tha se Lidhja Demokratike e Kosovës nuk do të marrë pjesë në seancën për buxhetin, pasi ajo nuk ishte thirrur me konsultim paraprak dhe se si e tillë është në shpërputhje me rendin kushtetues.
Ai tha se pikat e rendit të ditës është dashur të kalonin nëpërmjet një diskutimi serioz paraprak.
“Kjo seancë nuk është asgjë tjetër përveçse mjet i zakonshëm populist dhe veprim politik me të cilin LVV është mësuar të veprojë”, tha ai.
“Për ta fshehur mungesën e numrave për krijimin e institucioneve, sot po provohet treni i fundit, një seancë e paligjshme, jologjike dhe plotësisht në kundërshtim me rendin kushtetues dhe me logjiken dhe praktikën parlamentare, vetëm që Kurti dhe LVV të zhveshen nga përgjegjësitë e tyre”, shtoi Zemaj.
Nis seanca
Kryetari i Kuvendit të Kosovës, Dimal Basha, e nisi seancën.
Të pranishëm në sallë janë vetëm deputetët e Lëvizjes Vetëvendosje, si dhe disa nga pakicat joserbe, gjë që pritet që seanca të dështojë.
Basha: Jam i hapur për takim me partitë lidhur me formimin e komisioneve
Kryetari i Kuvendit të Kosovës, Dimal Basha, tha gjatë seancës se është i gatshëm që sa më parë ta thërrasë një mbledhje të Kryesisë së Kuvendit me përfaqësuesit e të gjitha subjekteve politike.
“Të vazhdojmë së paku me formimin e katër komisioneve të përhershme dhe, në këtë mënyrë, të mundësohet votimi i marrëveshjeve ndërkombëtare, buxhetit vjetor, buxhetit të tri komunave dhe i raportit të RTK-së për t’ia ndarë mjetet transmetuesit publik”, tha Basha.
Ai nguli këmbë se çështjet e kësaj seance “nuk kanë të bëjnë me veprime politike”.
“Prandaj, përsëri u bëj thirrje të gjitha subjekteve politike t’i analizojnë me maturi në kontekst të rrethanave shtetërore që gjendemi dhe pritet e qytetarëve tanë, të cilët nuk e meritojnë ta pamundësojnë votimin e këtyre ligjeve jetike për shkak të inateve të paarsyeshme politike”, tha Basha.