Basha: Ndiej përgjegjësinë e madhe që më është besuar
Në fjalimin e tij të parë pasi u zgjodh në krye të organit ligjvënës, Basha foli për përgjegjësinë që ndien, rëndësinë e Kuvendit dhe u bëri thirrje deputetëve për bashkëpunim.
“Derisa ndiej nderin dhe mirënjohjen për votën tuaj, ndiej edhe përgjegjësinë e madhe që më është besuar. Kuvendi është zemra e demokracisë sonë, vendi ku përfaqësohen zërat e të gjithë qytetarëve”, tha Basha.
Ai theksoi se Kosova “është e ndërtuar mbi sakrifica dhe mbi besimin e përbashkët se liria dhe shteti jonë janë më të mëdha se çdo interes i përveçëm. Republika jonë është e ndërtuar mbi sakrifica të panumërta: mbi gjakun, mundin dhe qëndresën e atyre që besuan se e ardhmja e kombit ishte më e rëndësishme se vetë jeta e tyre”.
“Një përulje dhe falënderim nga zemra u takon grave, vajza, pra nënave dhe motrave tona, të cilat brez pas brezi sakrifikuan, rritën, punuan në heshtje dhe ofruan dashuri dhe përkushtim. Ato ishin dhe mbesin themeli i një shoqërie të shëndoshë që ne e gëzojmë”, nënvizoi Basha.
Ai shtoi se mbrojtja e Kosovës duhet të jetë detyrë e të gjithëve, pushtetit dhe opozitës, pavarësisht se ai pret dallime të mëdha mes partive, sepse “jetojmë në një demokraci”.
“Ju bëj thirrje për bashkëpunim. Është koha të dëshmojmë se pavarësisht dallimeve politike, ne e kemi guximin dhe mençurinë për të punuar së bashku për interesin më të lartë për vendin tonë”, theksoi ai.
Ai gjithashtu i bëri thirrje Serbisë ta njohë pavarësinë e Kosovës.
Time Kadrijaj: Zhvillim interesant
Deputetja e Aleancës për Ardhmërinë e Kosovës (AAK), Time Kadrijaj, tha pas zgjedhjes së Dimal Bashës kryeparlamentar se partia e saj kishte vullnet të lirë për ta mbështetur atë, por jo të gjithë votuan njësoj.
“Do të shohim se si do të zhvillohet seanca në vazhdim”, tha ajo.
Në orën 12:30 pritet zgjedhja e pesë nënkryetarëve: një nga LVV, PDK dhe LDK, një nga komuniteti serb, dhe një nga partitë tjera joshumicë.
Ehat Miftaraj: Lajm i mirë zgjedhja e kryetarit të Kuvendit
Ehat Miftaraj nga Instituti i Kosovës për Drejtësi (IKD) tha se "nëse LVV mendon se i njëjti i përfaqëson vlerat më të mira të saj si parti, është legjitime dhe e drejtë e pakontestueshme e LVV-së të përfaqësohet nga z. Dimal Basha".
"Të shpresojmë se sot përfundon edhe zgjedhja e nënkryetarëve dhe të finalizohet konstituimi i Kuvendit për të hapur rrugën e formimit të qeverisë", shkroi Miftaraj në Facebook.
"Kur ka vullnet politik nga deputetë që interes kanë Kosovën dhe jo interesat e ngushta personale dhe partiake, lehtësisht zbatohet Kushtetuta dhe vendimet e Gjykatës Kushtetuese", shtoi ai.
Çfarë pritet të ndodhë në orën 12:30?
Në orën 12:30 pritet zgjedhja e pesë nënkryetarëve: një nga LVV, PDK dhe LDK, një nga komuniteti serb dhe një nga partitë tjera joshumicë.
Sipas Kushtetutës, tre nënkryetarët e propozuar nga tri grupet më të mëdha parlamentare zgjidhen me shumicën e votave të të gjithë deputetëve të Kuvendit.
Dy nënkryetarë përfaqësojnë komunitetet që nuk janë shumicë në Kuvend dhe ata zgjidhen me shumicën e votave të të gjithë deputetëve.
Njëri nënkryetar do të jetë nga radhët e deputetëve të Kuvendit që mbajnë vendet e rezervuara ose të garantuara për komunitetin serb, dhe tjetri nënkryetar nga radhët e deputetëve të Kuvendit që mbajnë vende të rezervuara ose të garantuara për komunitetet tjera që nuk janë shumicë.