Izraeli dhe Irani zbatojnë armëpushimin pas kritikave të ashpra të Trumpit

Ushtria iraniane e ka mohuar se ka lëshuar raketa ndaj Izraelit disa orë pas hyrjes në fuqi të armëpushimit, raportoi televizioni shtetëror iranian.

Televizioni e citoi Shtabin e Përgjithshëm të Forcave të Armatosura të Iranit - që përfshin ushtrinë e rregullt dhe Gardën Revolucionare – që mohuan sulmin.

Ushtria izraelite tha më herët se kishte vërejtur lëshimin e raketave nga Irani, ndaj të cilave ministri izraelit i Mbrojtjes, Israel Katz, deklaroi se Izraeli do të përgjigjej “me forcë”.

Konflikti mes Iranit dhe Izraelit pati zhvillime dramatike gjatë orëve të fundit.
Ja një përmbledhje e shkurtër:

• Në orën 07:08, Donald Trump postoi në rrjetet sociale se një armëpushim midis Iranit dhe Izraelit kishte hyrë në fuqi

• Pak më shumë se një orë më vonë, Izraeli tha se e kishte pranuar propozimin amerikan për armëpushim, ndërsa Irani tha më parë se do t’i ndalte sulmet nëse Izraeli do ta bënte të njëjtën gjë

• Më pas, në orën 09:30, ushtria izraelite tha se kishte vërejtur raketa të nisura nga Irani dhe i kishte kapur mbi veri të Izraelit

• Irani e ka mohuar të ketë lëshuar raketa, por Forcat e Mbrojtjes së Izraelit ngulën këmbë se Izraeli do të “përgjigjet me forcë”

• Para se të fillonte armëpushimi, të dyja palët shkëmbyen sulme të mëdha gjatë natës

• Mediat shtetërore iraniane thonë se valë raketash nga Izraeli kanë goditur kryeqytetin dhe qytete të tjera – të paktën nëntë njerëz janë vrarë, përfshirë një shkencëtar bërthamor

• Në Izrael, të paktën katër njerëz janë vrarë dhe 22 të plagosur në Beersheba

Agjencitë ndërkombëtare të lajmeve kanë publikuar pamje të sulmeve iraniane në qytetin Bersheba, në jug të Izraelit, të martën:

Izraeli ka goditur Iranin në tri faza, deri në orën 9 të mëngjesit të së martës, sipas kohës lokale, tha zëdhënësi i shtabit qendror të ushtrisë iraniane, sipas televizionit shtetëror iranian, raporton Reuters.

Televizioni shtetëror iranian tha më herët se armëpushimi do të hynte në fuqi në Iran nga ora 7:30 e së martës, sipas kohës lokale, teksa forcat e armatosura të Iranit akuzuan Izraelin për kryerje të sulmeve pas kësaj kohe.

Këshilli Suprem i Sigurisë Kombëtare i Iranit, organi më i lartë i tij i sigurisë, tha më herët se forcat e tij të armatosura janë të përgatitura për t'iu "përgjigjur bindshëm" sulmeve të reja.