Drejtpërdrejt Dehari e shtyn seancën konstituive pas kërkesës së Kurtit për kohë për një marrëveshje për president

Ehat Miftaraj nga Instituti i Kosovës për Drejtësi tha për Radion Evropa e Lirë se ndonëse Kuvendi duhet të konstituohet brenda 30 ditësh nga certifikimi i rezultateve, mos realizimi i kësaj "nuk prodhon automatikisht pasoja juridike".

Kjo do të thotë se jo domosdoshmërisht duhet shkuar në zgjedhje të parakohshme.

Komisioni Qendror i Zgjedhjeve i certifikoi rezultatet më 8 korrik 2026.

Sipas tij, kjo situatë “delegjitimon gjithçka”, ndërsa nëse presidenti nuk zgjidhet deri më 5 tetor, vendi shkon në zgjedhje.

Deputeti i Lidhjes Demokratike të Kosoës, reagoi ndaj vendimit për shtyrjen e seancës për konstituimin e Kuvendit.

Sipas tij, LDK-ja nuk ka qenë “as e njoftuar as e informuar”.

“Ky është Albin Kurti. Ai din edhe të debatojë edhe të hapë fushatë elektorale edhe të kërkojë kohë shtesë, duke menduar se është një dhe i vetmi mbi Kushtetutën dhe vullnetin politik të dalë nga zgjedhjet e fundit”, tha ai.

Sa i përket mundësisë për një marrëveshje politike me LVV-në, Zemaj tha se shpresonqë brenda ditës së sotme “mund të ketë lëvizje pozitive”.

Kryetari i Partisë Demokratike të Kosovës, Bedri Hamza, ka reaguar ndaj vendimit për shtyrjen e seancës për konstituimin e Kuvendit të Kosovës.

Shtyrja u bë me kërkesë të Albin Kurtit, kryetarit të partisë fituese të zgjedhjeve, Lëvizja Vetëvendosje (LVV), njëkohësisht kryeministër në detyrë.

Hamza duke folur për gazetarët në holl të Kuvendit e quajti papërgjegjësi këtë vendim.

“Kjo është një shenjë e mungesës së seriozitetit nga partia që ka fituar shumicën e votave. Po shihet që vazhdojnë sjelljet e tyre të papërgjegjshme në raport me institucionet”, tha Hamza.

I pyetur nëse do të shqyrtonin një takim me LVV-në, Hamza tha se nuk kanë nevojë për takime “pa rezultat”.

“Nuk kemi nevojë të takohemi. Ne kemi deklaruar rolin tonë që do të jemi parti në opozitë”, tha Hamza.

Albin Kurti tha se partisë së tij i duhet më shumë kohë për të gjetur një marrëveshje politike për zgjedhjen e presidentit të ri të Kosovës, një post kyç në gjithë ngërçin politik pothuajse dyvjeçar.

“Ne duam të ecim përpara bashkërisht, por na duhet pajtueshmëri sa më i gjerë për presidentin unifikues, ashtu siç e kërkon kushtetutshmëria, për të cilën u betuam sot. Konstituimi i kësaj radhe nuk bën të jetë sërish drejt edhe një shpërndarje të Kuvendit dhe përsëri zgjedhjeve të parakohshme, të paarsyeshme, të panevojshme për qytetarët e të dëmshme për ekonominë”.

Ai shtoi: “Andaj, i nderuari kryesues, Avni Dehari, kërkojmë kohë shtesë që t`ju japim shanse bisedimeve politike për marrëveshje për president a presidente të re”.

Sa për t’jua kujtuar, Kurti është në bisedime me LDK-në për një marrëveshje politike, por takimet e deritanishme nuk kanë sjellë fryt.

Nevojitet prania e të paktën 80 deputetëve në sallën e Kuvendit që votimi për president të jetë i vlefshëm.

Këta numra nuk i ka e vetme asnjë parti.