Drejtpërdrejt Dehari e shtyn seancën konstituive pas kërkesës së Kurtit për kohë për një marrëveshje për president

Kryeministri në detyrë, Albin Kurti, ka thënë në një konferencë për media se partia e tij Lëvizja Vetëvendosje kërkon bisedime me partitë e tjera parlamentare për ta gjetur një marrëveshje për zgjedhjen e presidentit, para se të vazhdohet me seancën konstituive të Kuvendit.

“Është e nevojshme t’i kthehemi diskutimeve për ta zgjidhur çështjen e presidentit, dhe kur ta kemi një marrëveshje ta thërrasim vazhdimin e seancës konstituive”, tha Kurti.

Duke folur pas ndërprerjes së seancës konstituive, Kurti shtoi: “Pra, kur të kemi të siguruar që kemi bërë çdo gjë për ta shmangur shkuarjen edhe në një palë zgjedhje të panevojshme për shtetin, të paarsyeshme për qytetarët e të dëmshme për buxhetin dhe ekonominë”.

Kurti ka qenë në bisedime me Lidhjen Demokratike të Kosovës, por deri tani nuk ka arritur pajtueshmëri.

Ai i ftoi për bisedime edhe Partinë Demokratike të Kosovës dhe Aleancën, të cilat e kanë refuzuar deri tani, duke zgjedhur të qëndrojnë në opozitë.

Papërgjegjësi e veprim për "pazar politik", e ka konsideruar mospropozimin e kandidatit për kryetar të Kuvendit nga Lëvizja Vetëvendosje, deputeti i Aleancës, Besnik Tahiri.

Sipas tij, moskonstituimi i Kuvendit të Kosovës është “jashtëzakonisht i dëmshme për Kosovën”.

“Nuk kemi të bëjmë me një problem kushtetues. Këtu ka problem me një logjikë autoritare për t'ia arritur t'i marrë të tri pushtetet: Presidentin, Qeverinë dhe Kuvendit. Nuk kemi të bëjmë me krizë kushtetuese. Është e pastër sikur loti procedura dhe është situata jashtëzakonisht e lexueshme”.

Tahiri ka kritikuar kryetarin e Lëvizjes Vetëvendosje, Albin Kurti, për mos arritjen e një marrëveshjeje.

“Nëse ka qenë qëllimi për me dalë prej këtij rrethi vicioz dy vjeçar, pse nuk ke fol me partitë politike për presidentin e Kosovës, se nyja, problemi thelbësor nuk është te qeveria, nuk është te Kuvendi, por është te presidenti po e ke neglizhuar deri në këtë ditë”.

Vullnet Bugaqku nga Instituti Demokratik i Kosovës, tha se afati për konstituimin e Kuvendit të Kosovës skadon nesër në mesnatë, ndërsa shtyrja e seancës synon t’u japë më shumë kohë subjekteve politike për të arritur një marrëveshje për formimin e institucioneve.

Sipas Kushtetutës së Kosovës, afati 30-ditor për konstituimin e Kuvendit përfundon nesër.

“Duhet të presim se çfarë do të ndodhë në seancën e radhës dhe nëse eventualisht do të konstituohet Kuvendi, si dhe do të zgjidhen kryetari dhe nënkryetarët e Kuvendit”, tha Bugaqku për Radion Evropa e Lirë.

Në një vendim të vitit të kaluar, Gjykata Kushtetuese tha se Kushtetuta e vendit i detyron deputetët ta konstituojnë Kuvendin brenda 30 ditëve nga data e shpalljes zyrtare të rezultateve të zgjedhjeve.

Komisioni Qendror i Zgjedhjeve i certifikoi rezultatet më 8 korrik, kjo nënkupton se 30 ditë mbushen të premten, 7 gusht.

Ja çfarë kishte thënë Kushtetuesja për këtë në qershor 2025:

Pika 124

Duke iu rikthyer përcaktimeve të paragrafit 1 të nenit 66 të Kushtetutës përmes të cilave specifikohet se: “Kuvendi i Kosovës zgjidhet më mandat katërvjeçar, duke filluar nga dita e seancës konstituive, që mbahet brenda tridhjetë (30) ditësh nga dita e shpalljes zyrtare të rezultateve të zgjedhjeve.”

Në versionin në gjuhën angleze të Kushtetutës, dispozita e nenit 66 është formuluar si vijon: “The Assembly of Kosovo shall be elected for a mandate of four (4) years, starting from the day of the constituive sesion, ëhich shall be held ëithin thirty (30) days from the oficial announcment of the election results”. (Gjykata sqaron se ky formulim në gjuhën angleze – “shall be held” – paraqet një normë me karakter detyrues, dhe jo fakultativ, sipas përdorimit të standardizuar të gjuhës normative dhe kushtetuese edhe në të drejtën anglo – saksone, sipas Black’s Law Dictionary, “shall” is “mandatory”, not “permissive”).

Pika 131.

Më tej, Gjykata duke iu rikthyer përcaktimeve në paragrafin 1 të nenit 66 të Kushtetutës thekson se vetë struktura e kësaj dispozite kushtetuese nënkupton se mbajtja e seancës konstituive brenda afatit tridhjetë (30) ditor, nuk është mundësi formale apo orientuese, por detyrim kushtetues që lidhet ngushtë me fillimin e mandatit të legjislaturës së re.

Ehat Miftaraj nga Instituti i Kosovës për Drejtësi tha për Radion Evropa e Lirë se ndonëse Kuvendi duhet të konstituohet brenda 30 ditësh nga certifikimi i rezultateve, mos realizimi i kësaj "nuk prodhon automatikisht pasoja juridike".

Kjo do të thotë se jo domosdoshmërisht duhet shkuar në zgjedhje të parakohshme.