Krasniqi ndër "të moderuarit e UÇK-së"
Avokatja e Jakup Krasniqit, Venkateswari Alagendra, pyeti po ashtu Rubinin nëse pajtohet që Krasniqi, Ramë Buja dhe Sokol Bashota ishin udhëheqës të moderuar brenda UÇK-së.
Rubin pohoi se kjo është e vërtetë, duke shtuar se "ekstremistët brenda UÇK-së rrezikonin jetën e mijëra civilëve", ndërsa "të moderuarit si Krasniqi e Thaçi synonin nënshkrimin e Marrëveshjes së Rambujesë për të siguruar mbështetjen e Perëndimit dhe për të mbrojtur popullsinë".
Seanca në Dhomat e Specializuara aktualisht është në pauzën e drekës.
Kjo është një përmbledhje e asaj që dëshmoi James Rubin deri më tash:
- Thaçi vepronte kryesisht si udhëheqës politik, pa kompetenca për vendime ushtarake brenda UÇK-së.
- Thaçi duhej të merrte miratimin e komandantëve për çdo vendim të rëndësishëm ushtarak.
- Thaçi, Krasniqi dhe disa udhëheqës të tjerë të UÇK-së ishin të moderuar dhe përpiqeshin të siguronin mbështetjen perëndimore.
- Thaçi e konsideronte Amerikën simbol të fuqisë dhe prioriteti i tij kryesor ishte mbështetja e SHBA-së.
- Nuk ka asnjë informacion që lidh Thaçin ose Krasniqin me krime lufte ose ekzekutime.
Për ju që sapo na jeni bashkuar...
Derisa pauza e drekës vazhdon, ju kujtojmë se ish-ndihmësi i sekretarit amerikan të Shtetit, James Rubin, është i pari që hapi dëshminë e mbrojtjes për ish-eprorët e UÇK-së në Hagë.
Rubin është një diplomat dhe ekspert i njohur amerikan me mbi 35 vjet përvojë në politikën e jashtme.
Në vitin 1999, ai ishte i angazhuar si negociator i posaçëm për të siguruar çmobilizimin e Ushtrisë Çlirimtare të Kosovës.
Në rolin e dëshmitarit, ai u thir nga ekipi mbrojtës i Hashim Thaçit, ish-udhëheqës politik i UÇK-së.
Thaçi vepronte kryesisht si udhëheqës politik, pa kompetenca për vendime ushtarake brenda UÇK-së, dhe duhej të merrte miratimin e komandantëve për çdo vendim të rëndësishëm ushtarak, tha Rubin gjatë dëshmisë.
Mbrojtja e të akuzuarve i tha Radios Evropa e Lirë se lista e atyre që do të dëshmojnë në anën e tyre, nisur nga 15 shtatori, është konfidenciale.
Në media, megjithatë, qarkulluan disa emra - në mesin e tyre: Wesley Clark, William Walker, Bernard Kouchner e të tjerë.
Të njëjtit u përmendën edhe në një listë që zbuloi mbrojtja në vitin 2022.
Rinis seanca
Seanca e dëshmisë rinisi pas pauzës së drekës me një deklaratë nga dy përfaqësuese të Qeverisë amerikane, të pranishme në sallë, të cilat theksuan se synojnë të mos ndërhyjnë dhe të mos e ndërpresin procesin, duke shtuar se mund të ndërhyjnë vetëm në raste të veçanta lidhur me burimet brenda Qeverisë së SHBA-së.