د پاکستان د بهرنیو چارو وزارت ویاند شفقت علي خان پر افغان طالبانو تور لګولی چې د پاکستان په خاوره کې د امنیتي پوستو د جوړولو هڅه کوي.
شفقت علي خان د تورخم له تړل کېدو څه باندې یوه اوونۍ وروسته وویل چې د طالبانو حکومت باید دا ستونزه د همغږۍ د کمېټې په شمول د دوه اړخیزو میکانیزمونو له لارې حل کړي.
خو د ځايي طالب چارواکو په وینا، د تورخم پوله د پاکستان لخوا د فبروري په ۲۱مه په یو اړخیزه توګه د سرحدي پوستو د جوړولو په اعتراض کې وتړل شوه.
د تورخم پولې تړل کېدو افغان او پاکستاني سوداګرو ته په ملیونونو ډالر زیان اړولی.
سلګونه لارۍ چې سوداګریز توکي لیږدوي او زرګونه نور کسان چې ناروغان هم پکې شامل دي، له یوې اونۍ راهیسې د تورخم پولې دواړو غاړو ته بند پاتې دي او له سختو ستونزو سره مخ دي.
اسلم خان، چې د لوګر ولایت اوسیدونکی او د تورخم پولې سره یې په سمنټو بار لارۍ ولاړه ده ازادۍ راډیو ته وویل:
«ډیرې ستونزې شته. خدای دې په ټولو مسلمانانو رحم وکړي او دا پوله خلاصه شي چې روژه هم ده او موږ لاړ شو د خیره»
د علي په نوم یو بل ډریور هم له ستونزو شکایت کوي چې په سبزیو او مېوې ډک موټر یې ایسار ولاړ دی:
«په خدای قسم، ډېرې ستونزې شته، موږ خپله ټوله هستي مصرف کړې، اسانتیاوې او هوټلونه نشته، دا د حکومتونو ترمنځ معامله ده، دا موږ ته زیان رسوي، او موږ خپل بارونه له لاسه ورکوو. دا د مالټو بار دی او هرڅه خراب شوي دي.»
په تورخم کې سوداګرو هم پر حکومتونو غږ وکړ چې د دواړو هېوادونو ترمنځ سوداګري له سیاسي او امنیتي ستونزو جلا وساتي.
د تورخم د سوداګرو د اتحادیې مشر وحید شینواري د ازادۍ راډیو مشال څانګې ته وویل چې د تورخم پولې تړلو له امله د دواړو هېوادونو ترمنځ سوداګري سخته زیانمنه شوې ده.
په تورخم کې د پاکستان یوه اداري چارواکي، چې د نوم له څرګندولو یې ډډه وکړه، وویل د پولې د بیا پرانیستلو په برخه کې هیڅ پرمختګ نه دی شوی.
