په افغانستان کې له موقت اوربند وروسته د پاکستان په ګډون ځینو هېوادونو ته د لوړپوړو افغان چارواکو سفرونو افغانان تر پخوا ډېر سولې ته هیلهمند کړي دي.
د ولسمشر محمد اشرف غني سلاکار محمد یوسف پشتون وايي، که څه هم دا به ډېره عملي نهوي چې د کلونو جګړه دې ډېر ژر حل شي، خو وايي پیلیې ضرور دی.
ښاغلي پشتون د چهارشنبې په ورځ «۱۳۹۷ کال د غبرګولي ۳۰» ازادي راډیو ته وویل چې افغان حکومت باید د جامع سولې لپاره ژر تر ژره ملي ستراتېژي رامنځته کړي.
نوموړي زیاته کړه:
"زما هدف دا دی چې له دومره ډېرو کلونو ګډوډیو، جګړو او دربدریو څخه وروسته سوله راوستل هم داسې اسانه کار نهدی، د هغې لپاره په ملي، سیمهییزه او نړیواله کچه یو منظم پروګرام په کار دی."
دا څرګندونې په داسې حال کې کېږي چې تېره ورځ لوړپوړی افغان پلاوی د افغان سولې د بهیر او د کابل او اسلاماباد د اړیکو د رغېدو لپاره پاکستان ته تللي وو.
که څه هم د سې شنبې په ورځ د افغانستان د کورنیو چارو وزارت ویاند ویلي وو چې د دغه سفر نتیجې به وروسته په ډاګه شي، خو د چهارشنبې په ورځ بېلابېلو حکومتي ویاندویانو په دې اړه ازادي راډيو ته د معلوماتو د نهلرلو له امله له څه ویلو ډډه وکړه.
ټاکل شوې چې د ملي یووالي حکومت اجرائیه رئیس عبدالله عبدالله هم د پاکستان له ولسمشر سره د سولې پر وړاندې د موجوده ستونزو په اړه خبرې وکړي.
په ورته وخت کې ولسمشر محمد اشرف غني د سولې لپاره د هملند د ولسي حرکت له غړو سره په کتنه کې ویلي چې که طالبانیې ومني حاضر دی چې د یوه کال لپاره اوربند وکړي.
د امریکا په ګډون یو شمېر هېوادونو هم په افغانستان کې د سولې او دایمي ثبات د ټینګښت په برخه کې د وروستیو اقداماتو هرکلی کړی او په دې برخه کې يې د پاکستان پر مرسته یو وار بیا ټینګار کړی دی.
د سې شنبې په ورځ په افغانستان کې د بهرنیو ځواکونو نوي قوماندان جنرال سکاټ مېلر د امریکا د سنا د وسلهوالو خدمتونو کمېټې ته وویل چې په افغانستان کې د پاکستان له ملاتړ پرته د اوږد مهالي ثبات ټینګول سخت دي، خو ناممکن نهدي.
د ولسي جرګې غړی عبدالقادر ځاځی وطندوست وايي د سولې په اړه وروستیو اقداماتو دی ډېر هیلهمند کړی دی.
نوموړي زیاته کړه:
"د لومړي ځل لپاره موږ د دواړو خواوو له اړخه په عمل کې یو څه ولیدل چې هغه اوربند و، تر څنګیې پاکستان او نورو ګاونډیو هېوادونو ته زموږ د پلاوو تګ داسې خوشبینۍ ډېرې کړي چې دا ځل په عمل کې ځیني تغییرات رامنځته کېدونکې دي."
د ښاغلي ځاځي په خبره د حکومت تر څنګ افغان ولس هم باید د سولې د ټینګښت لپاره له رامنځته شوي فرصته په استفادې د جګړې پر ښکېلو خواوو فشار راوړي چې لومړی اوربند او بیا د سولې خبرې پیل کړي.
راپور: محمد حدیث پردېس
