د کابل د نن ورځې چاپي ورځپاڼو پاکستان ته د لوړپوړي افغان پلاوي د سفر او له وسلهوالو طالبانو سره د اوربند په نتېجو مقالې او تبصرې خپرې کړې دي.
- ویسا
له پاکستان سره څه معامله روانه ده؟ تر عنوان لاندې د ویسا خپلواکې ورځپاڼې په سرمقاله کې راغلي دي چې په وروستیو کې د سولې د خبرو او له پاکستان سره د اړیکو او راشه درشې په اړه له اټکل لیرې خبرونه خپرېږي.
سرمقاله لیکونکی پوښتنه کوي چې له پاکستان سره په څه خبرې روانې دي؟ او د ملا فضلالله له وژلو پرته اسلاماباد نور کوم امتیاز غواړي او څه به افغانستان ته ورکوي؟
په سرمقاله کې وړاندې راغلي، که خبره د یوې ډلې طالبانو د سولې له بهیر سره د یوځای کېدو وي او د داعش په شکل کې جګړه دوام کوي، نو دا کومه لویه لاسته راوړنه نه، بلکې د ولس له احساساتو سره لوبې کول دي.
د سرمقالې لیکوال وړاندیز کوي چې ولس ته باید روښانه شي چې له پاکستان سره د سولې او جوړ جاړي په نوم څه روان دي؟
- دنیا
دنیا خپلواکې ورځپاڼې هم پهدې اړه په خپله سرمقاله کې لیکلي دي چې سوله د ملت اصلي غوښتنه ده، خو له پاکستان سره د افغانانو پر ملي ګټو د معاملې په قیمت نه!
په سرمقاله کې وړاندې راغلي دي چې د حکومت مشران باید پهدې پوه شي چې افغانان سوله غواړي، خو پهدې قیمتيې نهغواړي چې پاکستان ته له هر څه ورتېر شو.
که څه هم د سرمقالې لیکوال دا نهدي لیکلي چې پهدې برخه کې له څه اندېښنه لري، خو زیاته کړې يې ده چې افغانان سرې کرښې او ملي ګټې لري او هېڅچا ته اجازه نهورکوي چې معامله پرې وشي.
په سرمقاله کې وړاندیز شوی چې افغان حکومت باید د سولې په برخه کې دقیق واوسي او هر څه چې کوي باید د افغانستان ملي ګټې او سرې کرښې په نظر کې ونیسي او مخ په وړاندې قدم واخلي.
- هېواد
هېواد دولتي ورځپاڼه بیا په خپله سرمقاله کې د تېر کوچني اختر په درېیو ورځو کې د حکومت او وسلهوالو طالبانو ترمنځ د شوي اوربند ګټو ته تم شوې ده.
ورځپاڼې لیکلي دي چې د اوربند پراخ هرکلي د وسلهوالو طالبانو فکرونه هم بدل کړي دي.
په سرمقاله کې وړاندې راغلي دي:
"سره لهدې چې وسلهوالو طالبانو د اوربند له پای ته رسېدو وروسته خپلې حملې یو وار بیا پیل کړي، خو یو زیات شمېر طالبان په ښارونو کې پاتې شول او بېرته جګړې ته ونهګرځېدل."
د سرمقاله لیکونکي د معلوماتو له مخې چې لا هم په یو شمېر ولایتونو کې زیات شمېر طالبان د خپلو مشرانو د جګړې امر نهمني او له خلکو او افغان حکومت سرهيې خبرې روانې دي.
په سرمقاله کې راغلي چې د اوربند په ورځو کې ولس او حکومت له جګړې د ستړي طالب ښه هرکلی وکړو، خو برعکس د دې ډلې مشرانو دغه طالبانو ته د سزا ورکولو خبره وکړه چې دې حالت په طالبانو کې درزونه پیدا کړل.