Күлкү кербени

Тээ илгери, өткөн кылымда, айтылуу Чарли Чаплин өзүн өзү сактоо инстинктин күчөтүүнүн жана рухий саламаттыкты сактоонун маанилүү дарысы –– юмор деп таамай айткан тура. Таажы вирусуна байланыштуу карантин маалында да юмор адамзатка жардамга келди.

* * * * *

–– Карантин маалында эмнеге жетиштиңер?

–– Көп эле нерсеге. Мисалы, аялым упа, бет май, атырга кетчү акчаларды кыйла эле үнөмдөп калды.

–– Өзүңчү?

–– Өзүм чачтарачтыкты өздөштүрө баштаган жубайыма кардар болуп берүүгө үйрөндүм.

* * * * *

–– Видеодо өтө капалуу көрүнөсүң го, курбум?”

–– Мен батиримди ушунчалык мизилдетип тазаладым эле, саат басып, ушундай күндөрү эч конок келбей атпайбы!

* * * * *

–– Опе-ей, чык татырбас Чынарбайыбыз кыйын чыкты го!

–– Эмне болуптур?

–– Ал карантин күчөгөн маалда “үйүмө конокко келбесеңер таарынам” деп СМС жибериптир!

* * * * *

–– Апе-ей, балакетиңди алайын!.. Тиги күйөөң эмне кылып отурат? –– деп видеодо сүйлөшүп жаткан Шоңурдун кайненеси сурап калды.

–– Ал жөн отурбайын деп ширеңкенин ар бир талын антивирус зат менен кайра-кайра аарчып жатат, –– деди Шоңурдун аялы.

* * * * *

–– Өкмөт катуу эскертти: карантин маалында үйлөнүү тоюна таптакыр тыюу салынат!

–– А берки... ажырашуу жөнүндө өкмөт эчтеке айтпаптырбы? Дагы жакшы, үйлөнө электерге ойлонуу үчүн кошумча шанс жаралган турбайбы!

* * * * *

–– Жаным, таажы вирусунун карантининен силер –– аялдар эле утуптурсуңар.

–– Эмнеге?

–– Эркектер бүт укуктарынан айрылыптыр: бар, ресторандарга же футболго бара албай камалып калдык. Аялдар болсо мурдагыдай эле сыналгыда сериал көрүшөт, ара-чолодо ыракаттанып тамак жасашат, кааласа үй тазалайт, жок дегенде улам-улам беткап үтүктөйт...

* * * * *

–– Жаным, 4 күндөн бери үйдө камалып отурасың. Сыртка чыгып келчи!

–– Опе-ей, полиция кармап алып, карантинди буздуң деп акчалай жазага кириптер кылсачы?..

–– Ошол жазаны мен эле төлөп берейин, деги! Жадатып ийдиң, сериалды жөн көрсөтпөй...

* * * * *

Телефонум жөткүрүп калыптыр. Таажы вирусу жөнүндө видео маалыматтардын көптүгүнөн го деп корком...

* * * * *

“Шоңур, кара жерге кир! Эмнеге пол жуубай отурасың?!.” деген ачуу айкырыкты угаар замат, Шоңур тактай жуугуч чүпүрөктү чака сууга малып ала чуркады.

–– Жаным, тим эле отурчу, артисттенбей! Коңшулардын баласынын аты да Шоңур тура! –– деп аялы жоошутканда гана тигил эргул нымдуу чүпүрөктү жерге таштады.

* * * * *

Мен деле Италиядагылардан кем эмесмин го деп кечээ кечинде балконго чыктым эле, ария аткарам деп, анан анча-мынча дүйнөлүү болдум!

Эми кечинде кайра чыксам, жуп тапичкенин экинчи сыңарын да мага ыргытышаар, коңшуларым!..

* * * * *

Урматтууларым! Умрага эми уруксат жок, ордуна үй ичинде туристтик саякат сунуштайбыз! Таңкы саат 8:30да бети-колду жууган бөлмөгө саякат. Андан соң сапарыбыз татынакай жайга –– ашканага багытталат. Нанүштөдөн соң экскурсиянын катышуучуларына ар бир бөлмөгө кывзыктуу саякат уюштурулат. Ар бир саякатчы өз бөлмөсүн экологиялык шартка ылайыктап кооздошу күтүлөт. Аларга чаң соргуч, пол жуугуч, терезе тазалагыч сыяктуу жабдуулар бекер берилээрин кубанычтуулук менен маалымдай кетелик. Бул чеберчилик сабагында үй тапшырмасын мыкты аткаргандарга атайын упай берилет. Ал эми саат 13:00тө болсо экскурсия катышуучуларын аябай сонун түшкү тамак күтөт. Андан кийин айтылуу курорттогу кырдаал сунушталат: сиздер диванга ыңгайлашып жайгашып, сиеста маалынын ыракатына чөмүлөсүздөр. Албетте, кечкурун сиздер үчүн сейилдөөгө мүмкүнчүлүк берилет. Эгерде кечээ бөлмөлөрдү оң жактан сол тарапка кыдырсаңыздар, бүгүн анын тескери багытында сейилдешке мүмкүнчүлүк аласыздар. Эгерде бөлмө аздык кылса, анда бурчтарды да туристтик мерчем катары белгилей аласыздар. Сейил маалында сүрөткө селфи кылып (өзүңүздү өзүңүз) тартышыңыз үчүн жарыкты жандырып алыңыздар.

Кана, эмесе, ажайып саякатка карай алга!..

* * * * *

Бахтияр Шаршеев кыргызчалаган чакан тасма.

* * * * *

(TT)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.

* * * * * * *

–– Урматтуу полиция! Мындай катачылыкка эми эч жол койбойм, карантин эрежесин бузбайм. Мени коё берсеңиз! Канча сом берсем кутулам?

–– Макул. Сомуң өзүңдө калсын. Артыкбаш беткап болсо, 2-3тү бере салсаң жетишет!

* * * * * * *

–– Жанагы Абдышүкүргө айткылачы, айланайындар! Вирус аскерин жок дегенде Ала-Тоо менен Мекеден алып чыгып кетсинчи!

* * * * * * *

Достор, ушул катаал учурда, байболгурлар, сый-урматтан тайбай бири-бирибизден өтө алыс туралычы!

* * * * * * *

–– Өткөндө сен эмне конвертти албай дыргаяктап качтың?

–– Анда мен “Уландан” деген сөздү “Ухандан” деп окуп алыпмын!

* * * * * * *

–– Таажы вирусу таркатчу эң кооптуу коркунуч булагын окумуштууларыбыз аныкташты?

–– Ал эмне экен?

–– Интернет...

* * * * * * *

–– Мага банк ар күнү жаңы беткап, жаңы самын жеткирип берип жатат.

–– Анчалык эмне салым коштуң эле ага?

–– Салым кошпой эле... Банктан бир нече миллион сомдук насыя алгам!..

* * * * * * *

* * * * * * *

–– Муфтият ыйлаак молдо баланы жазалап салыптыр?

–– Кантип?

–– Эми бош калган мечитке келбей, үйүңдөн эле өңгүрөп ыйлагын деп буюруптур.

* * * * * * *

–– Өкмөткө аябай ачууланып турам. Антарктикага кеткен дааватчыларыбыздан эч кабар албай койбодубу!..

–– Деги алар пингвин тилин үйрөнүп алып кетишиптирби?

* * * * * * *

–– Алё-о! Бул –– Өкмөтпү? Алыскы карантин бекетине жиберилген полиция кызматкерлерине тамак-ашы үчүн канча каражат бөлүндү эле?

–– Опе-ей, алар казына эсебинен тамак да жешеби?

* * * * * * *

Жарыя! Бүгүн, 1-апрелде, Акаев менен Бакиев Бишкекке кайтып келишет. Алар Кум-Төрдөн жана Азия универсал банктан кымтыган акчаларды таажы вирусуна каршы күрөш коруна салтанаттуу тапшырышат. (Эгерде алардын тегаты бозгун саясатчылардыкына окшош чыкса, анда тек гана “боло берет турмушта, өзгөчө алсак – кыргызда!” деп кобурап коюшуңуздарды өтүнөбүз).

* * * * * * *

Сатып алуу кумарына кишенделген ("шопаголик") айым:

“Таажы вирусунун” коркунучуна караганда, чоң дүкөнгө кире албай калгандык алда канча тозок экен!”

* * * * * * *

–– Вирустан коркосуңбу, же аялыңданбы?

–– Албетте, вирустан. Бирок аялымдан көбүрөөк корком!

* * * * * * *

Атаганат! Маркс “коммунизм” деп ушул учурду айтса керек: карантинге байланыштуу эч ким иштебейт, бирок баары тең токтобостон жеп эле атат, жеп эле атат...

* * * * * * *

Карантиндин бешинчи күнү жубайым менен чечилишип баарлаша баштадым. Көрсө, аркы-теркини баамдай алган акылдуу эле жан экен!..

* * * * * * *

–– Мурда маектешимден спирт буркурап жыттанып турса, тим эле ичиркенип турчумун.

–– Эмичи...

–– Эми аларга “Лукашенко айткан дарыны ичкен тура” деп эле жылуу мамиле кылып калдым...

* * * * * * *

* * * * * * *

Жаңы макалдар.

Желмогуз жигитке жетимиш беткап аздык кылат.

Беткабыңды көрсөт, анан ким экениңди айтып берейин.

Чептен беткаптын күчү бек.

* * * * * * *

(TT)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.