Күлкү кербени

* * * * *

–– Курбулар! “Карантин маалында үйгө эч кимди киргизбегиле!” деген талапты качан алып салышат? –– деп бирөө “Инстаграм” аркылуу досторуна суроо узатты.

–– Эмне болуп кетти деги?

–– Ошол мөөнөтүн тактай албай жатпаймбы. Күйөөм болсо “үйгө киргизир койчу!” деп эшикти какканына беш күндүн жүзү болду...

* * * * *

–– Өкмөтүмө өмүр өткүчө ыраазымын!

–– Анчалык эмне болуп кетти?

–– Эгерде өкмөт жогорку маяна төлөчү болсо, анда мен Кытай, Италия, Испания же Сауд Арабстанга саякатка барып таажы вируска кабылмак экенмин... Маянам өп-чап болгонуна сүйүнүп жатам.

Дагы караңыз

Карантиндеги азилдер

* * * * *

–– Биздин мекемебиз карантин маалында да иштеши керек болчу. Бирок мен амал кылдым...

–– Кандай амал?

–– Кара күчкө улам-улам жөтөлүп койдум эле, тез жардам келип, өздөрүнө 14 күнгө эс алууга алып кетти.

* * * * *

–– Карантин аяктаар замат дарыланышым керек болуп турат.

–– Таажы вирусунан шектенип жатасыңбы?

–– Жок. Семирүүгө жана алкоголго каршы дарыланышым керектигине көзүм аябагандай жетип турат.

* * * * *

–– О-о кудай! Сага ыраазымын, сага алкыш айтам!

–– Анчалык эмне болуп кетти?

–– Мурда бардыгы тең “бекерпоз болуп, диванда жамбаштап жаткандан башка ишиң жок, жеткен жалкоосуң!” деп урушаар эле. Эми “диванынан козголбой жата берди, өтө жоопкерчиликтүү жаран экен!” деп өкмөттөн бери мени мактап жатышат.

Дагы караңыз

Банк мага «Таажы вирусун жуктурба!» деди

* * * * *

–– Жаным, сени азыр алыскы-алыскы бир курорт шаарга эс алууга алып барсам кандай дейсиң?

–– Опей, азыр карантинде коңшу көчөгө да чыгарышпайт да!

–– Ка-ап, сонун сунушумдан баш тарттың да!..

* * * * *

–– Мени “карантин маалында нөөмөткө кечигип чыктың” деп жумушумдан эскертүү беришти, –– деди медайым.

–– Силерде жыргал экен! Мен болсом ишиме жашыруун барып келем деп кармалып, акчалай жазага кабылбадымбы!

* * * * *

Карантин маалында сабактагы үй тапшырманы онлайн аткарып жаткан тестиер Шоңурга алданемеден шек санаган мугалими капысынан кайрылды:

–– Капырай, компүтердеги тергичти сен эки колуң менен эмес, төрт колуң менен тере баштадың го? Жок дегенде апаңа атыжок манжасындагы шакегин “сабак алдында алып салыңызчы” деп эскертип айтып койчу!..

* * * * *

Алло, курбум! Бүгүн жаман иш болду... Мени кызматка кабыл алган фирмага карантин бүтөөр замат жетип барып, бирок өтпөй калдым!.. Жо-ок, кызматка өтөөрүн өттүм, бирок эткээл денем менен каалгасынан өтө албай койдум!..

* * * * *

(TT)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.

Тээ илгери, өткөн кылымда, айтылуу Чарли Чаплин өзүн өзү сактоо инстинктин күчөтүүнүн жана рухий саламаттыкты сактоонун маанилүү дарысы –– юмор деп таамай айткан тура. Таажы вирусуна байланыштуу карантин маалында да юмор адамзатка жардамга келди.

* * * * *

–– Карантин маалында эмнеге жетиштиңер?

–– Көп эле нерсеге. Мисалы, аялым упа, бет май, атырга кетчү акчаларды кыйла эле үнөмдөп калды.

–– Өзүңчү?

–– Өзүм чачтарачтыкты өздөштүрө баштаган жубайыма кардар болуп берүүгө үйрөндүм.

* * * * *

–– Видеодо өтө капалуу көрүнөсүң го, курбум?”

–– Мен батиримди ушунчалык мизилдетип тазаладым эле, саат басып, ушундай күндөрү эч конок келбей атпайбы!

* * * * *

Дагы караңыз

Таажы вирусу тажаттыбы? Азилдешели...

–– Опе-ей, чык татырбас Чынарбайыбыз кыйын чыкты го!

–– Эмне болуптур?

–– Ал карантин күчөгөн маалда “үйүмө конокко келбесеңер таарынам” деп СМС жибериптир!

* * * * *

–– Апе-ей, балакетиңди алайын!.. Тиги күйөөң эмне кылып отурат? –– деп видеодо сүйлөшүп жаткан Шоңурдун кайненеси сурап калды.

–– Ал жөн отурбайын деп ширеңкенин ар бир талын антивирус зат менен кайра-кайра аарчып жатат, –– деди Шоңурдун аялы.

* * * * *

–– Өкмөт катуу эскертти: карантин маалында үйлөнүү тоюна таптакыр тыюу салынат!

–– А берки... ажырашуу жөнүндө өкмөт эчтеке айтпаптырбы? Дагы жакшы, үйлөнө электерге ойлонуу үчүн кошумча шанс жаралган турбайбы!

* * * * *

–– Жаным, таажы вирусунун карантининен силер –– аялдар эле утуптурсуңар.

–– Эмнеге?

–– Эркектер бүт укуктарынан айрылыптыр: бар, ресторандарга же футболго бара албай камалып калдык. Аялдар болсо мурдагыдай эле сыналгыда сериал көрүшөт, ара-чолодо ыракаттанып тамак жасашат, кааласа үй тазалайт, жок дегенде улам-улам беткап үтүктөйт...

* * * * *

–– Жаным, 4 күндөн бери үйдө камалып отурасың. Сыртка чыгып келчи!

–– Опе-ей, полиция кармап алып, карантинди буздуң деп акчалай жазага кириптер кылсачы?..

–– Ошол жазаны мен эле төлөп берейин, деги! Жадатып ийдиң, сериалды жөн көрсөтпөй...

* * * * *

Телефонум жөткүрүп калыптыр. Таажы вирусу жөнүндө видео маалыматтардын көптүгүнөн го деп корком...

* * * * *

“Шоңур, кара жерге кир! Эмнеге пол жуубай отурасың?!.” деген ачуу айкырыкты угаар замат, Шоңур тактай жуугуч чүпүрөктү чака сууга малып ала чуркады.

–– Жаным, тим эле отурчу, артисттенбей! Коңшулардын баласынын аты да Шоңур тура! –– деп аялы жоошутканда гана тигил эргул нымдуу чүпүрөктү жерге таштады.

* * * * *

Мен деле Италиядагылардан кем эмесмин го деп кечээ кечинде балконго чыктым эле, ария аткарам деп, анан анча-мынча дүйнөлүү болдум!

Эми кечинде кайра чыксам, жуп тапичкенин экинчи сыңарын да мага ыргытышаар, коңшуларым!..

* * * * *

Урматтууларым! Умрага эми уруксат жок, ордуна үй ичинде туристтик саякат сунуштайбыз! Таңкы саат 8:30да бети-колду жууган бөлмөгө саякат. Андан соң сапарыбыз татынакай жайга –– ашканага багытталат. Нанүштөдөн соң экскурсиянын катышуучуларына ар бир бөлмөгө кывзыктуу саякат уюштурулат. Ар бир саякатчы өз бөлмөсүн экологиялык шартка ылайыктап кооздошу күтүлөт. Аларга чаң соргуч, пол жуугуч, терезе тазалагыч сыяктуу жабдуулар бекер берилээрин кубанычтуулук менен маалымдай кетелик. Бул чеберчилик сабагында үй тапшырмасын мыкты аткаргандарга атайын упай берилет. Ал эми саат 13:00тө болсо экскурсия катышуучуларын аябай сонун түшкү тамак күтөт. Андан кийин айтылуу курорттогу кырдаал сунушталат: сиздер диванга ыңгайлашып жайгашып, сиеста маалынын ыракатына чөмүлөсүздөр. Албетте, кечкурун сиздер үчүн сейилдөөгө мүмкүнчүлүк берилет. Эгерде кечээ бөлмөлөрдү оң жактан сол тарапка кыдырсаңыздар, бүгүн анын тескери багытында сейилдешке мүмкүнчүлүк аласыздар. Эгерде бөлмө аздык кылса, анда бурчтарды да туристтик мерчем катары белгилей аласыздар. Сейил маалында сүрөткө селфи кылып (өзүңүздү өзүңүз) тартышыңыз үчүн жарыкты жандырып алыңыздар.

Кана, эмесе, ажайып саякатка карай алга!..

* * * * *

Бахтияр Шаршеев кыргызчалаган чакан тасма.

* * * * *

(TT)

«Азаттыктын» материалдарына пикир калтырууда төмөнкү эрежелерди так сактоону өтүнөбүз: адамдын беделине шек келтирген, келекелеген, кордогон, коркутуп-үркүткөн, басмырлаган жана жек көрүүнү козуткан пикирлерди жазууга болбойт. Эрежени сактабай жазылган пикирлер жарыяланбайт.