Күлкү кербени

* * * * * * *

Жаңы көчө аттары…

Айрым-бир шаарга Казакстандын көзү тирүү президентинин ысымы берилгенде, казак куудулдары дароо азил чыгарышты:

- Карагым, шаардагы төлөнчө соода үйүнө кантип жетем?

- Апе-ей, Сиз адашып калган турбайсызбы? Сырт жактан келгенсиз го? Эмесе, такси кармаңыз да, оболу Нурсултан Назарбаев көчөсүнө өтүңүз, андан солго - Бакытжан Сагынтаев көчөсүнө бурулуңуз, андан ары Кайрат Абдразакулы Мами көчөсү менен жолуңузду улаңыз. Андан соң Касым-Жомарт Токаев көчөсүнө өтүп, орто жолдон Нурлан Зайруллаевич Нигматулин көчөсүнө оң жакка өтүп кетиңиз. Мен болсо Динмухамед Кунаев көчөсүндө кала берем.

(Айрым окурмандарга кыска түшүндүрмө:

Нурсултан Назарбаев – элбашы.

Бакытжан Сагынтаев – өкмөт башчы.

Кайрат Абдразакулы Мами – Жогорку соттун төрагасы.

Касым-Жомарт Токаев – Сенаттын төрагасы.

Нурлан Зайруллаевич Нигматулин – Мажилис төрагасы.

Динмухамед Кунаев – маркум; “элбашы” наамын албай туруп элбашы болгон дешет).

* * * * * * *

Көп балалуу ата жөнүндө жомок

Илгери-илгери бир кишинин көп баласы болуптур. Уулдары да, кыздары да бар экен.

Алардын улуусу – Алматы экен. Оболу алма багын өстүрүп, кийин анын ордуна ишканаларды, эми болсо дүкөндөрдү куруп калыптыр. Дагы бир уулу – Шымкен (Чимкент) экен. Соодага бүйрө жан экен, эч кимден акча сурабай эле оокатын кылып, коңшу өлкөгө алып сатарлык менен жер кезип турат дейт. Дагы бир уулу – Караганды, дайыма көмүр жыттанып турат дешет. Актоо деген кызы мунай менен газга, анан деңиз портуна чиренип, тим эле агасы Алматыга карабай койкоктоп калганын айтышат. Дагы бири – Семей экен. Ал жаш кезинде радиациялык нурданууга кабылып, азыркыга чейин жөткүрүп жүрөт дейт. Дагы бири – Байкоңур деген кызы экен. Анын жолу болуп, түндүктөгү бай коңшусуна турмушка чыгыптыр, бирок Плисецк деген дагы бир күнүлөшү пайда болуп, эми кабагы суз жүрөт дешет. Ал эми балдарынын кенжеси жана эркеси – Астана деген уулу экен. Атасы аны аябай чалчактатып, эмне акча болсо эле ошонукуна ташынып жатат дешет…

Эми уктай кой, жомоктун калганын эртең улантайын. Алдей, алдей!..

(Айрым окурмандарга кыска түшүндүрмө:

Жомокто сөзгө алынган аталыштарды фолклор иликтеген адистер казакча киши аттарынын арасынан али бүгүнкүнө чейин таба албай келишет).

* * * * * * *

Көчөдөгү тыгын

- Бүгүн эмне эле унаалар мурда болбогондой чоң тыгын түзүп калган?

- А-а, уга элек турбайсызбы! Элбашы Нурсултан Назарбаевдин унаасы коштоочулары менен кошо жаңы эле Нурсултан Назарбаев көчөсүнө өтүп кетти. Ошого байланыштуу жолду убактылуу жаап коюшту. Эми алар кайра Нурсултан Назарбаев атындагы аба майданына кайтып кетмейинче тыгын боло берет ко…

(Жыйнап, которгон - TT).

Жин ыйлап ийиптир

Бир күнү Путин, Назарбаев жана Рахман Кремлде кеңешип отурса, Путин берки экөөн Москва дарыясынын боюна балык уулоого чакырып калыптыр.

Бир убакта Путиндин кайырмагы солк этип, анысын тартып алса, кумара да илинип чыгыптыр. Путин кумараны аарчып койсо, ичинен бир Жин чыга калыптыр.

‑ Силерге эч нерсенин кереги деле жок, президенттер экенсиңер. Тек гана бирден сурооңорго жооп берейин, таксырлар!.. – дептир Жин.

‑ Болуптур. Менин бир гана суроом – Орусия качан оңолот?

‑ 15 жылда!

Анда Путин “мен бийликтен кеткен соң оңолот тура!” - деп ыйлап жибериптир.

‑ Менин деле суроом ошол. Казакстан деги канча убакта оңолот? – деп Назарбаев сураптыр.

‑ Сенин 120 жылдыгыңда!

‑ Ка-ап, мен да ал учурду көрбөй калат турбаймынбы! - деп Назарбаев да жашып кетиптир.

‑ Тажикстанчы? – дептир Рахман.

Анда Жин өзү шолоктоп ыйлап жибериптир.

‑ Эмнеге ыйлап жатасыз?

‑ Тажикстандын гүлдөшүн сен түгүл мен да көрбөй калчудаймын! – дептир Жин.

* * * * *

Дарбыз тандоо

Имамаали Рахман калк турмушунан кабардар болуп койойунчу деп каадаланып, Дүйшөмбүнүн базарын кыдырып калат.

Караса, бир чал дарбыз сатып отурат. Дарбыз баасы – тим эле асманда!

‑Аксакал, дарбыздын бирдей эле түрү бар экен, тандоого да мүмкүн эмес! Баасын болсо ай-асманга жеткирип салыпсыз!

‑Имамаалы, өзүң эле калыс болчу: сени шайлаганда деле элге тандоо мүмкүнчүлүгүн берген эмессиң. Туугандарың ушунчалык көп, аларды баккан каражатка караганда дарбызым кардарлар үчүн алда канча арзан эле! – дептир сатуучу карыя.

* * * * *

Сырдуу кат

Бир тажиктин тууганы чет мамлекетке бозгунга кетет. Бозгунда жүргөн тууганына берки киши кат жазат:

“Азыр бизде баары кымбат болуп калды, ал түгүл бир кило эттин баасы 25 саманиге чыкты!”

Бул катты окуп алып, коопсуздук кызматынан келип алиги кишини коркутушат. “Сөзсүз каттын баш жагында өлкөдө арзанчылык экенин жаз”!” – деп сес көрсөтүшөт.

Алиги киши алыскы тууганына кайрадан кат жөнөтөт:

“Азыр бизде баары арзан болуп калды. Базарга башпаксаң, бир килейген пилдин баасы - болгону 22 самани. Пилди сатып алып отурбастан, бул акчага 3 гана самани кошуп койсоң эле - бир кило уй этин сатып алышың мүмкүн!”

* * * * *

Ким жетим?

“Тажикстанда жетим барбы?” деп суроо салганга бир дүйшөмбүлүк жооп кайырыптыр:

“Тажикстанда бардыгынын агайын-тууганы бар. Ал түгүл жалгыз президентибиз Имамаалы Рахмандын да толгон токой тууганы бар. Бизде бир гана бечара жетим бойдон калды!”

“Ал ким болду экен?”

“Ал – МЫЙЗАМ”.

* * * * *