Күлкү кербени

1930-жылдар. Сталиндик жазалоолор маалы. Археологдор Каракум чөлүндө изилдөө маалында кум дөбөдөн бир пирамиданы казып алышты. Анын ичине тешип киришип, буйткасынан бир мумияны да табышты. Бирок азыркы кээ бир маданият министрликтери каныйлагандай, чөлдө да радиокөмүртек, ДНК же башка усулду колдончу эч жабдуу жок болчу, ошондуктан бул пирамида кимдин урматына курулгандыгы эч белгисиз болуп, дал ушу көйгөй археологдорду кыйнап жатты.

Чукул кабарды угаар замат чөлгө жетип келген шыпылдаган чекисттер тобу пирамиданын ичине кирип кетип, кайра чыгышты да, археологдорго жарыя кылышты:

- Ой, жолдоштор! Бул, көрсө, Тутанхамонго чейинки фараондордун бириники турбайбы!

- Ал фараондор Египетте жашачу да? Кантип аныктадыңыздар? Илимий кайсы усулду колдондуңуздар?

- Э-э! Биздин жашыруун ыкмабыз бар. Аны колдонсок эле, мумиянын өзү баарын мойнуна алды! Ал түгүл ал “АКШ, Британия жана Жапониянын тыңчысымын, анан калса панисламист жана пантүркчү да болчумун” деп кол коюп берди. Мынакей, колу!..

Интернет булактарынан.

TT.

Илгери-илгери бир өлкө болуптур. Жомоктогу бул өлкөдө, кызык, депутаттар да болуптур.

Бир күнү жараткан өзү башка бир өлкөнүн окумуштууларын ойготуп койгонбу, айтор, алар компүтер дегенди ойлоп таап, өндүрө башташыптыр. Анан алар сатыкка түшүп, алиги жомоктогу өлкөнүн депутаттары да сонуркап, элден калбайлык деп сатып ала баштаган экен.

Ошолордун бири тим эле кооз бир чоң компүтерди сатып алган экен дейт!

Бир жолу ал депутат компүтерчи адисти чакырып, интернетке туташтырып берчи, - деп сураныптыр (талап деле кылган болуш керек).

"Макул, ляппай!" деп алиги адис келип караса, тиги депутат компүтерин жылуу килемче менен думбалап коюптур, дешет!

- Ой, мунуңуз эмне?

- Жанагы компүтерлерде коркунучтуу вирусу болот дешет ко. Суук өтпөсүн, вирус жолобосун деп ушинтип жылуулап каптап койдум, - дептир депутат.

(Эскертүү. Ал өлкөнүн жана депутаттын аты ачык айтылбайт. Эгерде сиздин өлкөңүздө да ушуга окшогон окуя болгон болсо, бул - тек гана байкоостон дал келгендик деп билиңиз).

TT.