Казакстанда саясий кризис уланууда. Бул өлкөнүн жетекчилиги кырдаалды жөнгө салуу үчүн Жамааттык коопсуздук келишим уюмунан көмөк сурады. Бул уюмга мүчө болгон Кыргызстан коңшу өлкөгө аскер жөнөтүү маселесин талкуулап жатат. Бүгүн Жогорку Кеңеш чукул жыйынга чогулмак. Кворум жок жыйын 7-январга жылды. Казакстандагы соңку окуялардын Кыргызстан, дегеле Борбор Азияга таасири кандай? Кыргызстан коңшу өлкөдөгү абалды жөнгө салуу үчүн кандай позиция карманышы керек? Бул суроолорду “Эксперттер талдайт” берүүсүнүн атайын чыгарылышында талкуулайбыз. Талкууга мурдагы вице-премьер-министр, генерал Токон Мамытов, саясий илимдердин кандидаты, эксперт Орозбек Молдалиев, тарыхчы, эксперт Алмаз Кулматов жана жарандык активист Руслан Акматбек катышты.
Кырсык
Кыргызстанда жыл башынан бери 2800дөн ашуун өрт кырсыгы катталып, 30дан ашуун кишинин өмүрүн алды. Быйыл 11 айда катталган кырсыктар 2020-жылга салыштырмалуу 12% көп. Өрт көп учурда электр жабдууларын колдонуудагы этиятсыздыктан келип чыгарын адистер белгилеп жатышат. Өрттүн алдын алуу жана өчүрүү боюнча эл аралык техникалык комитеттин (CTIF) маалыматына ылайык, Кыргызстанда абал өтө деле жакшы эмес. Соңку төрт жылдагы изилдөөгө караганда, тилсиз жоодо каза болгондор боюнча 55 өлкөнүн ичинен 13-орунда турат.
