Дрон чабуулунан кийин чыккан өрт
21-январь, жекшембиге караган түнү Ленинград облусунун Усть-Луга деңиз портунда чыккан өрттөн "Новатэк"компаниясынын терминалындагы газ сактай турган кампа күйүп кетти. Облустун Кингисепп районунун башчысы Юрий Запалацкий окуя тууралуу буларды билдирди.
"Саат 2:45те мага Ленинград облусунун губернатору чалып, Усть-Луга портундагы "Новатэк" ишканасында өрт чыкканын айтты. Түнкү саат үчтө өрт өчүрүү иштерин координациялоо үчүн Кингисепптин администрациясы федералдык, аймактык жана жергиликтүү кызматтарды топтоду. Ушул тапта объектиде иш жүрүп жатат".
Ленинград облусунун губернатору Александр Дрозденко өрттөн жабыркагандар жок экенин, кызматкерлер эвакуацияланганын маалымдады. Орусиянын расмий бийликтери өрттүн себебин айткан жок. Бирок маалымат каражаттары Украинанын аба күчтөрү чабуул жасаганын жазды.
"Фонтанка" маалымат булагы өрт дрондордун чабуулунан улам болгонун жазса, 47.news маалымат агенттиги эки дрондон аткылоо болгонун тактады.
Усть-Лугада "Новатэк" компаниясынын ири мунай заводу жайгашкан. Ал газ конденсатын иштетип, нафта, керосин, дизел жана мазут чыгарат. Ошол жерден компаниянын порттогу өзүнүн терминалы аркылуу продукция кемелерге жүктөлүп, экспортко жөнөтүлөт. "Фонтанка" жазгандай, жекшемби күнү кечинде портто Бельгиядан, Омандан жана Ливиядан келген үч кеме турган.
Ушул эле жекшембиге оогон түнү Орусиянын Тула, Смоленск жана Орлов облустары да дрондордун чабуулуна туш болгону, аларды Орусиянын абадан коргонуу күчтөрү атып түшүргөнү кабарланды.
21-январдын таңында орус аскери көзөмөлдөгөн Донецк артиллериялык соккуга кабылып, андан 20дан ашык киши мерт болгонун маалымат каражаттары жазды. Орусия дайындаган шаардын мэри Алексей Кулемзин чабуул үчүн Украинанын куралдуу күчтөрүн айыптады. Украин тарап окуя тууралуу комментарий берген жок.
Запорожьеге 95 жолу сокку урулду
Өткөн суткаларда орус аскерлери Украинанын Запорожье облусуна 95 жолу сокку урганын облустук аскер администрациясынын башчысы Юрий Малашко билдирди. Мындан тышкары Харьков облусуна дагы чабуул жасалганы маалымдалды.
20-январь күнү Украинага жети дрон жана эки ракета учурулган соң, өлкө аба чабуулу тууралуу эскертүү жарыялап, энергетикалык инфратүзүмдөргө карата чабуул үчүн Орусияны айыптаган.
Бул арада Украинанын президенти Владимир Зеленский Батыш менен жаңы келишимдерге кол коюларын билдирди. Ишембинин кечинде жасаган видеокайрылуусунда ал Батыштагы өнөктөштөр менен бир катар жаңы, эки тараптуу келишимдер даярдалып жатканын айтты.
"Биз өнөктөштөр менен жаңы макулдашууларды даярдап жатабыз. Алар абдан күчтүү, эки тараптуу келишимдер. Конкреттүү жыйынтыктар январь, февраль айларында болору күтүлүүдө".
Эгинге тийген ракета: Одессада дан кампалары күйүп кетти
Эки жылга чукулдаган согуш
Орусия 2022-жылдын февраль айында Украинага басып киргени Батыш өлкөлөрү Украинага аскердик жана башка жардам көрсөтүп келет. Согуш үчүнчү жылга созулуп, соңку 12 айда фронтто чоң өзгөрүүлөр болбой, жардам маселесинде АКШда каршылык күчөгөндүктөн, өлкөгө зарыл каражат, жабдуулар жай келүүдө.
Украинанын бийлиги бир нече жумадан бери өнөктөштөр менен сүйлөшүп, көбүрөөк саясий жана аскердик колдоо алууга аракеттенип жатат. Ал Орусиянын кышкы аба соккуларынын көбөйүшү жана Москванын Украинанын чыгышындагы жай, бирок катаал чабуулу Киевдин абадан жана жерден коргонуусун күчөтүү зарылдыгын көрсөтүп жатканын кайталап келет.
Январдын башында Киевдин ишенимдүү колдоочуларынын бири болгон Британия келерки жылы Украинага колдоосун 2,5 миллиард фунт стерлингге (3,19 миллиард долларга) жеткирерин билдирген.
Франциянын президенти Эммануэл Макрон февралда Украинага эки тараптуу коопсуздуктун кепилдиги боюнча келишимди аягына чыгаруу үчүн барарын билдирген. Ага ылайык Париж заманбап курал-жарактарды, анын ичинде алыскы аралыкка учуучу канаттуу ракеталарды жеткирери айтылган.
