Бириккен Улуттар Уюму 3-апрелде жарыялагандай, дүйнө жүзүндөгү жумуш орундарынын жарымы жасалма интеллекттин таасирине кабылышы ыктымал.
Уюмдун Соода жана өнүгүү агенттиги жарыялаган баяндамада, жасалма интеллект экономикаларды өзгөртүп, чоң мүмкүнчүлүктөрдү түзүп жатканы менен, ал учурдагы теңсиздикти ого бетер күчөтүү коркунучун да жаратышы мүмкүн экени белгиленет.
"Жасалма интеллект дүйнө жүзүндөгү жумуш орундарынын 40% таасирин тийгизип, өндүрүмдүүлүктү жогорулатуусу мүмкүн, бирок ошол эле учурда автоматташтыруу жана жумушсуз калуу кооптонууларын жаратат",- деп жазылат анда.
Мурунку технологиялык өнүгүүлөр негизинен жумушчуларга таасирин тийгизсе, бул жолу жасалма интеллект билимге негизделген секторлорду көбүрөөк жабыркатат.
Бул өнүккөн өлкөлөр жасалма интеллекттин терс таасирине көбүрөөк туш болот дегенди билдирет. Бирок ошол эле учурда алар жасалма интеллекттин артыкчылыктарын өнүгүп келе жаткан өлкөлөргө караганда жакшыраак пайдалана алышат.
Агенттиктин жетекчиси Ребека Гринспан жасалма интеллектин өнүгүшүндө адам факторун биринчи орунга коюунун маанисин белгиледи.
Ал ошондой эле жасалма интеллекти башкаруу боюнча талкууларга бардык өлкөлөрдүн катышуусу керектигин айтты:
"Жасалма интеллект боюнча жүрүм-турум эрежелери иштелип жатканда, өнүгүп келе жаткан мамлекеттер да бул жараянга катышууга тийиш. Антпесе, жасалма интеллект бир нече өлкөнүн гана кызыкчылыгына кызмат кылып, дүйнөлүк өнүгүүгө салым кошпой калат",- дейт Гринспан.
2023-жылы интернет, блокчейн, 5G, 3D басып чыгаруу жана жасалма интеллект сыяктуу алдыңкы технологиялар 2,5 триллион долларлык рынокту түзгөн. Бул көрсөткүч келерки он жылдыкта алты эсеге өсүп, 16,4 триллион долларга жетет деп күтүлүүдө.
Шерине