Казакстандын АКШга болгон экспортунун олуттуу бөлүгү 2-апрелде АКШнын президенти Дональд Трамп жарыялаган жаңы америкалык тарифтердин таасирине дуушар болбойт. Бул тууралуу Казакстандын соода жана интеграция министрлиги 3-апрелде билдирди. Маалыматка караганда, Вашингтон кабыл алган соода чаралары боюнча талдоо жүргүзүлүп, алардын Астана экспорттогон продукциянын көпчүлүк бөлүгүнө тийиштүү эместиги аныкталган
Министрлик билдиргендей, Казакстандын Америкага негизги экспорту чийки мунай, уран, күмүш жана темир куймаларынан турат. Бул категориялар жалпы товардын 92% түзөт жана алар АКШ президентинин атайын жарлыгында камтылган тизмеге киргизилген.
Министрликтин билдиришинче, кошумча тарифтер 2024-жылы АКШга 95,2 миллион долларлык экспортту түзгөн айрым товардык топторго гана таасирин тийгизет. Бул тизмеге төмөнкү продукциялар кирет: фосфор (15,9 миллион доллар), ферросилиций (12,7 миллион доллар), линзалар (4,1 миллион доллар), аммоний нитраты (2,4 миллион доллар) жана башкалар.
"Киргизилген тарифтик чаралар Казакстандын АКШга болгон жалпы экспортунун болгону 4,8 пайызына гана таасирин тийгизет. Өкмөт АКШ тарап менен кошумча тарифтерди Казакстанга колдонбоо мүмкүнчүлүгүн талкуулоо үчүн кеңешүүлөрдү баштайт", — деп айтылат министрликтин билдирүүсүндө.
Улуттук статистика бюросунун маалыматы боюнча, 2024-жылдын жыйынтыгы менен Астана менен Вашингтондун ортосундагы товар жүгүртүүнүн көлөмү 4,2 миллиард долларды түзүп, 2023-жылга салыштырмалуу 4% өскөн.
2024-жылы Казакстандан АКШга болгон экспорт 30,6 пайызга өсүп, 2 миллиард долларга жеткен. Ошол эле маалда Америкадан Казакстанга импорт 2,2 миллиард долларга жакындаган.
АКШ президенти Дональд Трамп 2-апрелде Кошмо Штаттардын соода өнөктөштөрүнө жооп катары жаңы төлөмдөр киргизилип жатканын жарыялаган.
Бул күндү "Американын боштондукка чыгуу күнү" деп атаган Трамп "америкалык өнөр жай тармагынын кайра жаралуу, Американын тагдыры өз ордуна кайткан күн" болуп жатканын кошумчалады жана "биз Американы кайрадан бай кыла баштаган күн" деп айтты.
АКШ президенти белгилегендей, америкалык базарга кирүүнү каалаган өлкөлөр эми "мындай артыкчылык үчүн төлөшү керек болот". Трамп былтыр президенттик шайлоо маалында ушул саясат үчүн өнөктүк жүргүзгөнүн, эми "ошол убадасын аткарганын" айтууда.
Шерине