"Европа Трамп тарабынан киргизилген бажы төлөмдөрүнө жооп берүүгө даяр" экенин Еврокомиссиянын төрайымы Урсула фон дер Ляйен билдирди. Кытай болсо, өз кезегинде "катуу контрчечимдерди" кабыл алууну убада кылды.
2-апрелде Трамп АКШга кире турган товарлардын импортуна глобалдык тарифтер тууралуу жарыялаган. Кытайга карата 34%, Евробиримдикке 20%, Жапонияга 24%, Индияга 26% тарифтер киргизилген.
"Америка киргизген универсалдык бажы төлөмдөр дүйнө жүзү боюнча ишканаларга жана керектөөчүлөргө катуу сокку урду. Европа жооп берүүгө даяр. Биз ар дайым биздин кызыкчылыктарды жана баалуулуктарды коргойбуз. Биз кызматташууга жана кагылышуудан сүйлөшүүгө өтүүгө даярбыз", – деп жазды фон дер Ляйен X социалдык түйүнүнө.
Фон дер Ляйен Трамптын глобалдык соода системасындагы кемчиликтерден кээ бирлер "адилетсиз пайда көрүп жатканы" тууралуу пикирин кайсы бир деңгээлде колдогону менен мындай чаралар "системаны оңдоого" жардам бербестигин кошумчалады.
Анын айтымында, Еврошаркет АКШнын болот жана алюминий үчүн киргизилген бажы төлөмдөрүнө каршы жооп чараларын иштеп чыгып, контрчечимдерге даярданууда.
Ушундай эле чараларга барууга камынып жатканын Кытайдын Соода министрлиги да билдирди. Мекеме тараткан билдирүүдө Бээжин Американын "субъективдүү жана бир тараптуу баалоолоруна негизделген тарифтери эл аралык соода эрежелерине каршы келип, тиешелүү тараптардын мыйзамдуу укуктарына жана кызыкчылыктарына чоң зыян келтирүүдө" деп белгиленет.
Кытай Вашингтонго соода өнөктөштөрү менен тең укуктуу диалог аркылуу маселелерди туура чечүүнү сунуштады.
АКШ президенти Дональд Трамп 2-апрелде Кошмо Штаттардын соода өнөктөштөрүнө жооп катары жаңы төлөмдөр киргизилип жатканын жарыялаган.
Бул күндү "Американын боштондукка чыгуу күнү" деп атаган Трамп "америкалык өнөр жай тармагынын кайра жаралуу, Американын тагдыры өз ордуна кайткан күн" болуп жатканын кошумчалады жана "биз Американы кайрадан бай кыла баштаган күн" деп айтты.
АКШ президенти белгилегендей, америкалык базарга кирүүнү каалаган өлкөлөр эми "мындай артыкчылык үчүн төлөшү керек болот". Трамп былтыр президенттик шайлоо маалында ушул саясат үчүн өнөктүк жүргүзгөнүн, эми "ошол убадасын аткарганын" айтууда.
Шерине